කන්‍යාවියක් ලවා පයින් ගැස්සවීම සහ පිට ඇතිල්ලීම

රාචි ත් රාවණ කතක්දරයක් ලියාගෙන යනව. ඒක කියවගෙන යද්දී, මට පොඩි කාලෙදි අපේ ආච්චි අම්ම කියල දුන්න රසබර ඉතිහාස කතා කීපයක් මතකයට ආවා. ඒවයින් සමහර කතන්දර වැටහුණේ ලොකු ඉස්කෝලෙනුත් අයින් වුණාටත් පසෙයි. ඔබ සමහර විට ඒවා දැනගන්න කැමති ඇති කියල හිතෙන නිසා ඒවයින් එකක් අද කියන්නම්.

ඒ කාලෙ රාවණ රජ්ජුරුවන්ට අක්කර 1000 විතර ලොකු පොල් වත්තක් තිබුණ. ඒක තිබුණෙ පිළියන්දල, "පොල්ගස් ඕවිට" ප්‍රදේශයේ.  පිළි=පීළිවලින්, යන්=යන, ද=දඬුමොණර, ල=ලන්ද. ඒ කියන්නෙ ඉස්සර කාලෙ පොල්ගස් ඕවිටින් කඩන පොල් ප්‍රවාහනය කිරීමට පිළියන්දල සිට දඬුමොණර කෝච්චි සේවයක් තිබුණ කියන එකයි.

පොල්ගස් ඕවිට පොල් වත්තේ පරන ගස් ඔක්කොම කපල අළුත් පැළ හිටවලා අවුරුදු ගාණක් ගිහිල්ලත් ඒවයෙ ගෙඩි හැදිල නෑ. ගෙඩි හැදෙන්නෙ නැති ගස් වලට "තුන් කුළුඳුළ්" කන්‍යාවියක් ලව්ව පයින් ගැස්සවුවාම ඒවයෙ ගෙඩි හැදෙනව කියල දන්නවනෙ.  තුන් කුළුඳුල් කන්‍යාවියන් කීප දෙනෙක්ම ලව්වා වරින් වර ඒ ගස් වලට පයින් ගැස්සවුවත් ඒවයෙ ගෙඩි පීදුනේ නෑ. වැඩේ බරපතලයි කියල හිතුව රාවණ රජ්ජුරුවන්ට "තුන් කුළුඳුළ්" මදි කියල හිතුව නිසා "හත් කුළුඳුල්" කන්‍යාවියක්ව හොයන්න පටන් ගත්ත. ඒත් හත් කුළුඳුල් කන්‍යාවියක් කොහෙන් කියල හොයන්නද...

ශ්‍රී රාවණ රජතුමාට ජාන පිටපත් සෑදීමේ තාක්ෂණය තිබුණ බව අද සෑම හෙළ ඉතිහාසඥයෙක්ම හොඳින් දන්නා සත්‍යයක්. "ක්ලෝනින්" (Cloning) යනු "කොළොන්" නැමැති හෙළ වචනයෙන් හැදුනක්. "ඕඩි යක්ෂයා" ලව්වා ජාන පිටපත් සෑදවීමට කියන්නේ "ඕඩි කොළොන්" කියලයි. නමුත් අද වන විට ඒ වචනය වැරදි දේකටයි භාවිතා වෙන්නෙ. රාවණ රජතුමා ජාන වෙනස් කම් කරපු බොහෝ වඳුරන්ව හැදුවා. හනුමාන් යනු එලෙස ජාන වෙනස් කම් කර හදාපු "ඕඩි කොළොන්" වඳුරෙක්. පසුව ඌ රාවණ රජතුමාගේ රසායනාගාරයෙන් පැන ගොස් වඳුරු පරපුරක්වම බිහිකළා.

රාවණ රජ්ජුරුවන්ට හොඳ අදහසක් කම්පනාටව ආව. එතුමා ජාන පර්යේෂණ කරන තම විද්‍යාගාරෙට ගිහිල්ලා තාමත් පැටව් නොලැබුණ වඳුරෙක්ව සහ වැඳිරියෙක්ව අරගෙන උන් දෙන්නව සංසර්ගයේ යොදවල "ඕඩි කොළොන්" තාක්ෂණයෙන් පිරිමි පැටව් දෙන්නෙක්ව සහ ගෑණු පැටික්කියන් දෙන්නෙක්ව හැදුවා. ලෝකයේ දක්ෂතම වෛද්‍යවරයා වූ රාවණ රජ්ජුරුවෝ නිපදවා තිබුණ රහසිගත හෝමෝන (හෝ=හෝරාවෙන්, මෝ=මෝරලා, න=නතරකරන) ඒ සඳහා භාවිතා කරපු නිසා එක පැටියෙක්ව හදන්න හෝරාවයි (එනම් පැයයි) ගත වුණේ. හෝමෝන භාවිතා කර උන්වත් විගහටම ලොකු කෙරෙව්ව. ඊට පස්සේ අළුත හදාපු වඳුරන්ව ජෝඩු දෙකක් විදියට වෙනම සංසර්ගයේ යොදවලා තවත් පැටව් දෙන්නෙක් හැදෙව්වා. ඒ පැටව් දෙන්නවත් ලොකු වුණාම සංසර්ගයේ යොදවලා වඳුරු පැටික්කියෙක්ව ගත්ත. දැන් ඒ වඳුරු පැටික්කිය "හත් කුළුඳුල්". වඳුරන්ගේ සහ මිනිසුන්ගේ ජාන 96%ක්ම වාගේ සමාන බැවින්, ඒ පැටික්කියගේ ජාන (ජා=ජාතකය, න=නංවන) සැකසුමේ / ක්ලෝන් වල සුළු වෙනසක් කරල "ඕඩි කොළොන්" කෙල්ලක් බවට පත් කළා. ආරේ ගුණ නෑරේ කියනව වගේ ඒ කෙල්ල ගස් උඩ නටන්නමයි කැමැති. පහත පින්තූරයත් බුකියේ තිබී හදිස්සියේම ඇස ගැ‍ටුණේ මේ කතාව ලියද්දීමයි.

අද කාලයේ ඕඩි කොළොන් කෙල්ලක්

පස්සෙ ඒ කෙල්ලවත් හෝමෝන යොදලා විගහට ලොකු කරවලා ඒකිට හෙළ බස උගන්වලා ඒකි ලව්වා රාවණ රජ්ජුරුවන්ගේ නොපීදුන පොල් වත්තෙ තිබුණ හැම පොල් ගහටම පයින් ගස්සවලා. මාස කීපයකින් හැම පොල් ගහකම වගේ ගෙඩි පීදුනාලු. ඊට පස්සෙ රාවණ රජ්ජුරුවො ඒ කෙල්ලට සම්මානත් ප්‍රදානය කරල.

ඒ වෙනකොටත් රාවණ රජ්ජුරුවන්ට ඉන්ද්‍රජිත් කුමාරයාව ලැබිල නෑ. දරුවො නැති නිසා රාවණ රජ්ජුරුවො සහ මන්දෝදරිය හරිම කණස්සල්ලෙන් තමයි ඉඳල තියෙන්නෙ. රාවණ රජ්ජුරුවන්ට එකපාට්ටම හොඳ අදහසක් ආව. පොල් වත්තෙ ගස් වලට පයින් ගහල ගෙඩි පූද්දපු කෙල්ලව ගෙන්නගෙන මන්දෝදරියටත් පයින් ගැස්සෙව්ව. මාස ගාණක් ගියත් මන්දෝදරියට දරුවො ලැබෙන පාටක් නෑ. ඊට පස්සෙ කෙල්ලව ආයිත් ගෙන්නගෙන තමන්ටම පයින් ගස්සව ගත්තා. සති දෙකක් යද්දිම මන්දෝදරී දේවිය මාළිගාවෙ පිළිකන්නට ගිහින් එතන තිබුණ ගස්ලබු ගහත් අල්ලගෙන වමනෙ දාන්න පටන් අරන්.....

රාවණ රජ්ජුරුවන්ගේ පොල් වත්තේ ගෙඩි පූද්දපු කතාව කටින් කට ගිහින් මේ වෙනකොට කුවේර රජ්ජුරුවන්ටත් ආරංචි වෙලයි තිබුණෙ. කුවේර රජ්ජුරුවොත් ඊට පස්සෙ ඒ කෙල්ලව ගෙන්නගෙන "කෙහෙල්හේනාව" ප්‍රදේශයේ තිබුණ තමන්ගේ අක්කර 500 ක් විතර වෙන පීදෙන්නෙ නැති ගස් තිබුණ කෙහෙල් වත්තෙ ගස් වලටත් පා පහර දීගෙන. ඒත් ඒවනම් පීදුනේ නෑලු.....

වර්ගපූර්ණිකාව නැමති ඉපැරණි යක්ෂ ගෝත්‍රික පුස්කොළපොතේ ඔය තොරතුරු ඔක්කොම සටහන් වෙනව. බොරුයි කියල හිතෙනවනම් ඒක හොයාගෙන කියවල බලන්න. පද නිරුක්තිත් ටක්කෙටම ගැලපෙන නිසා ආයිත් සැක කරන්න දෙයක් නෑ. ඒ වගේම ඉහත සඳහන් කළ  ප්‍රදේශ වල සිටින පැ‍රැන්නන් ඔය විස්තර හොඳට දන්නව. අපේ ආච්චි අම්ම තමයි මටත් ඔය ගැන මුලින්ම කිව්වෙ. (මීට වඩා මූලාශ්‍ර හොයන්න එපා, කිසිදු රාවණ ගවේශක වෙබ් අඩවියක ඇති කතන්දර වල ඔයිට වඩා මූලාශ්‍ර නැහැනෙ.)

මේ වෙනත් දෙයක්. පහත රූපයේ කරනව වගේ, කන්‍යාවියක් විසින් ඕනැම ගසක පිට ඇතුල්ලුවොත් ගහේ දළු දානවලු. හැබැයි මේ කෙල්ල ගහේ පිට ඇතුල්ලුවා විතරයි ගහේ තිබුණ කොළ ටිකත් හැලිල ගහේ පොතු ටිකත් වේලිලා ගියා. බලන්න ගහේ හැටි....

බොහෝ කෙල්ලන් ගස් වල පිට අතුල්ලනවා ඔබ දැක තිබෙනවා නේද? ඊට හේතුවනම් ඔවුන් තාමත් කන්‍යාවියන්ද කියා දැනගැනීමටලු. මේක ප්‍රසිද්ධ රහසක්.

සිංහල ක‍තෝලිකයන් යනු සිංහල බෞද්ධයින්ට වඩා හොඳ සිංහලයන්ය.

සිංහල බෞද්ධයින් යනු නියම සිංහලයින් කියලයි බොහෝ අය මෙච්චර කාලයක් හිතාගෙන හිටියේ. නමුත් සිංහල ක‍තෝලිකයන් යනු සිංහල බෞද්ධයින්ට වඩා නියම සිංහලයින් බව ඔබ දැනගෙන සිටියාද? මේ බව කියන්නේ අන් කවරෙක්වත් නොව, ශ්‍රී රාවණ රජතුමාව අප හෙළුවන් අතර ජනප්‍රිය කළ කලාසූරී අරිසෙන් අහුබුදු හෙළුවානන්ය.

අහුබුදුවන්ගේ වචන වලින් හෙළුවන් යනු හෙළයින්ට කියන හෙළ වචනයයි.  උදා: 2009 බක් 12 සිළුමිණේ අරිසෙන් අහුබුදුවන් මෙහෙම කියල තියෙනවා.

"සක්වළ වටය අංශක 360 ක් කොට ගත් අපේ ආදී හෙළයන් එය අංශක 30 බැගින් වූ දොළොස් රැසකට (රාශි) බෙදා මුල් රැස ‘හෙළු’ (එළු) කියා ගත්තා ‘හෙළු දිව‘ (හෙළ දිව) මුදුනින් ඇරැඹෙන රැස දොළොස් රැසේ මුල් ම රැස හෙළු රැස වුණා. හෙළු ම එළු වුණේ ‘හ් ලොප් වීමෙන්. ඔය රාශි 12 ම නිර්මාණය කළේ අපි. එතකොට සත්විසි නැකත් නිර්මාණය කළෙත් අපි."

2009 බක් 12 සිළුමිණ පුවත්පතට අරිසෙන් අහුබුදුවන් මෙලෙස පවසල තිබෙනවා.

ඉතිහාසය කෙසේ වෙතත් අද දෙමළ ජාතිකයන් අතරින් හින්දු භක්තිකයන් ද අවුරුද්ද සමරනවා. එසේ ම සිංහල අවුරුද්ද හුදෙක් සිංහල බෞද්ධයන්ට විතරක් නෙවෙයි සිංහල කතෝලිකයන්ටත් උරුමයි. මොකද, ඔවුන් අද අපිටත් වඩා සිංහල වෙලා. බෞද්ධ අපි තවමත් පාලිවලින් ගාථා කියද්දි ඔවුන් ලතින් බස අතහැරලා සිංහලෙන් යාච්ඥා කරනවා. ඔවුන් ‘මේරි’ මරියා කර ගත්තා. ‘ඇන්ටනි’ අන්තෝනි කර ගත්තා.

අරිසෙන් අහුබුදුවන් ප්‍රත්‍යක්ෂයෙන් අවබෝධ කරගත් පරිදි,
1. මුළු ලෝකයම හෙළයින්ගෙන් ශිෂ්ටාචාර වූ බව සත්‍යයක්නම්,
2. දුරකථන වලින් ඇමතීමේදී කියන "හෙළෝ" යනු හෙළ වචනයක් බව සත්‍යයක්නම්,
3. සිව්හෙළය යනු ඕස්ට්‍රේලියා, ආසියා, අප්පිරිකා, යුරෝපා යන මහද්වීප බව සත්‍යයක්නම්,
4. අප්‍රිකාව හෙවත අප්පිරිකාව යනු තාරක රජතුමාට අප්පිරිය වූ කාපිරියන්ව දැමූ රට බව සත්‍යයක්නම්,
5. වාරියපොළ ප්‍රදේශයේ රාවණාගේ දඬුමොණර ගුවන් තො‍ටුපොළක් තිබුණ බව සත්‍යයක්නම්,
6. රාවණ රජතුමා චක්‍රවර්තී රජෙක් බව සත්‍යයක්නම්,
7. ක්වීන් යන ඉංග්‍රීසි වදන කු හෙවත් පොළව හා විනි හෙවත් විඳින්නී යන සිංහල දෙවදනින් බිඳුණු පදයක් බව සත්‍යයක්නම්,
8. දො සතර හෙවත් දොස්තර නැමති හෙළ පදයෙන් ඩොක්ටර් නැමති වචනය හැදුණ බව සත්‍යයක්නම්,
9. නක්ෂත්‍රය ලෝකයට ගියේ හෙළයින්ගෙන් බව සත්‍යයක්නම්,
සිංහල ක‍තෝලිකයින් සිංහල බෞද්ධයින්ටත් වඩා සිංහල වීම සත්‍යයක්මයි.....!!!!!

බෞද්ධ උදවිය තාමත් පාළි බසින් ගාථා කීම සම්බන්ධයෙන් අහුබුදුවන් දැක්වූ අදහස් ගැන බෞද්ධයින්ගේ පිළිතුරු මොනවාද? (මා බෞද්ධයෙක් නොව රාවනාගමිකයෙක් බැවින් වෙනත් ආගම්/දහම් විවේචනය කරන්නේ නැහැ)


නොදන්න ඉතිහාසයක් ගැන කෙප්ප ලියන බක පඬියෙක් දවසක් අහුබුදුවන්ට බැනල තියෙනව මම දැක්ක. ඌටත් දෙකක් කියන්න මම මේක අවස්ථාව කරගන්නව.

"හෙළයට පහරන පාහර කැනහිලෝ, ‍තෝ දන්නවද බොල අහුබුදුවන් නොසිටින්නට සිංහල ක‍තෝලිකයන් යනු නියම සිංහලයන් බව අපට දැනගන්න ලැබෙන්නේ නෑ කියල. අපේ රට ‍රැක ගත්හේ අහුබුදුවන්. මහාවංසයෙන් සිංහල බෞද්ධයින්ට මුල් තැන ලබා දීල, සිංහල ජාතියට වී ඇති ඓතිහාසික අසාධාරණය වලක්වා නියම සිංහලයන් වන සිංහල ක‍තෝලිකයන්ව ‍රැක ගත්තේ, සිංහල ක‍තෝලිකයන්ට මේ රටේ උරුම විය යුතු ස්ථානය ලබා දුන්නේ අරිසෙන් අහුබුදුවන්ම බව තොපට නොතේරේද යකෝ. අරිසෙන් අහුබුදුවන්ට ‍තෝ ආයිත් අපහාස කරල තිබුණොත් මම ‍තෝව මරාගෙන මැරෙනව යකෝ. තොපේ රීරි මාංසය කනව යකෝ. අනේ පාහරයෝ, තොපි සිංහල ඉගෙන ගත්තනම් සිංහල කතන්දර පොත් ලියපිය, නැතිව නොදන්න ඉතිහාසය ගැන කෙප්ප කියන්නෙ නැතිව. පාහරයෝ. කලවැද්දෝ"

හ්ම්. ඒ ඇති.

තව දෙයක් කියන්න ඕනැ, මෙම ලිපියේ මාතෘකාවේ දැක්වෙන අදහස මගේ අදහසක් නොවෙයි කියල තේරෙනවනෙ, අරිසෙන් අහුබුදුවන් ජාතික පුවත්පතකට කියල තියෙන දෙයක්නෙ. එනිසා දැන් මේ මාතෘකාව දැකල රෙදි උස්සගෙන වර්ගපූර්ණිකාවට විරුද්ධව පොලු මුගුරු උස්සගන්න හදපු හෙළුවන් අපේ අරිසෙන් අහුබුදුවන්ටත් බනිනවද? නෑනෙ... අහුබුදුවන් හෙළුව පෙන්වද්දී සැබෑ රාවණ පාක්ෂිකයින් වන අප ඒ හෙළුව වැනීම කළ යුතුම දෙයක්.

ලෝකයට ශිෂ්ටාචාරය බෙදා දුන්නේ හෙළයින් විසින් බව මීට වසර 15 කට ප්‍රථමයෙන් (1997) අරිසෙන් අහුබුදු සූරීන් කියන විට “මෙම ලියුම්කරුද” ඊට සිනාසුනි. අපගේ මොල හැඩ ගස්වා ඇත්තේ එපරිද්දෙනි. නමුත් බටහිර ලෝකය විසින් දැනට සොයාගෙන ඇති තොරතුරු අනූව ඔහුගේ අදහස නිවැරදිය.

අවතාර යනු රාවණ රජතුමා අතීසාරයට හඳුන්වා දුන් ඖෂධයකි.

ලෝකප්‍රකට Avatar චිත්‍රපටය ශ්‍රී ලංකාව තුළ ප්‍රසිද්ධ වීමත් සමගම තරුණ පරපුර අතරත් "අවතාර" ගැන විශාල කතා බහක් ඇති වුණා. එනිසා "අවතාර" යනු මොනවාදැයි මා ගවේශණය කිරීමට පටන් ගත් අතර මුලින්ම විමසා බැලූයේ, සෑම දෙයක්ම පාහේ සටහන්ව ඇති වර්ගපූර්ණිකාව පුස්කොළපොතේ මේ සම්බන්ධයෙන් සටහන්ව තිබෙන්නේ කුමක්ද යන්නයි. මාව පුදුමයට පත් කරමින් අවතාර ගැන විස්තර එහි සටහන්ව තිබුණා.

සාමාන්‍යයෙන් "අවතාර" ලෙස අප හඳුන්වන්නේ අමනුෂ්‍යයින් / හොල්මන් ආදියයි. නමුත් අතීත හෙළයේ "අවතාර" ලෙස හඳුන්වා ඇත්තේ ඖෂධයක් බව කිව්වොත් ඔබ පුදුමයට පත් වේවි. ඉන්න... විස්තර කරන්නම්.

වර්ගපූර්ණිකාවේ සඳහන් වන අන්දමට "අවතාර" යනු රාවණ රජතුමා විසින් හදන ලද ඖෂධයකට යෙදූ හෙළ නමකි. අරිසෙන් අහුබුදු වන්ගේ මගෙහි යමින් එහි පද නිරුක්තිය බලමු.
අ = අමුඩය පිටින්
ව = වකු‍ටු වී
තාර = තාර ගා ගැනීම

"අමුඩය පිටින් වකු‍ටු වී තාර ගා ගැනීම" යනු වචනයේ පරිසමාප්ත අර්ථයෙන්ම පශ්චාත් ප්‍රදේශයේ තාර ගා ගන්න එකයි. තේරෙන බාසාවෙන් කියනවනම් "පුකේ තාර ගා ගන්න එක".

ශ්‍රී රාවණ රජතුමාගේ කාලයේදී හෙළයින්ට අතීසාරය හැදෙන්න පටන් ගත්තා. ඒක වසංගතයක් ලෙස හෙළදිව පුරාම පැතිරෙද්දී, ලෝකයේ දක්ෂතම වෛද්‍යවරයා වූ ශ්‍රී රාවණ රජතුමත් නිකම් හිටියේ නෑ බොහෝ පරීක්ෂණ කරල සාර්ථක විසඳුමක් සොයාගත්තා. එනම් බෙහෙත් වතුරේ පොඟවා හැදූ අමුඩයක්. අතීසාර රෝගියා එවන් අමුඩයක් ඇඳගෙන වැසිකිළියට ගොස් යටිබඩ හොඳින් නැවෙන ලෙසට වකු‍ටු වී ඖෂධ මිශ්‍ර කර සාදන ලද තාර ආලේපනයක් පස්ස පැත්තෙ ගාගන්න ඕනැ. එම ප්‍රතිකර්මය සිදුකළ හෙළුවෝ අතීසාරය නිට්ටාවටම සනීප කර ගත්තා.

එදා සිට "අතීසාරයට අමුඩය ගැසීම" හෙළයින් අතර ජනප්‍රිය වූ අතර ශ්‍රී රාවණ රජතුමා, තමාගේ එම "අමුඩය පිටින් වකු‍ටු වී තාර ගා ගැනීමේ" ප්‍රතිකර්මය "අවතාර" ලෙස කෙටියෙන් හැඳින්වුවා.

නමුත් පසුකාලයේදී පුස්කොළපොත් කියවා එම ප්‍රතිකර්මය වටහාගැනීමට නොහැකි වූ මලයාලි සක්කිලියන් සහ ඉන්දියානු බමුණන් එයට නිග්‍රහ කළා. එතනින් නොනැවතුණු පාහර බමුණන් හෙළ පුස්කොළපොත් වලට ගිණි තැබුවා. තාමත් "අතීසාරයට අමුඩය ගැසීම" පහත් දෙයක් ලෙස බොහෝ දෙනා සලකන්නේ පරයන් අප හෙළයට පොවා ඇති විශ නිසයි.

තම උපදේශකයන් හරහා ශ්‍රී රාවණයන්ගේ ඉතිහාසය හොඳින් හදාරා ඇති වර්තමාන ජනාධිපති මහින්ද රාජපක්ෂ මහතා මෙන්ම රනිල් වික්‍රමසිංහ මහතාත් "අතීසාරයට අමුඩය ගැසීම" ගැන වෙන වෙනම පර්යේෂණ සිදුකරවා තිබෙනවා. ඒවායේ ප්‍රතිඵල ඔබට ආරංචි වෙන්නට ඇති..... විශේෂයෙන්ම මහින්ද රාජපක්ෂ මහතා උතුරු ප්‍රදේශයේදී කරන ලද "අවතාර" පර්යේෂණ වලට ඉන්දියාවෙන් දැඩි ලෙස විරුද්ධතා එල්ල වූයේ බමුණන්ගේ කුමන්ත්‍රණ නිසාලු. නමුත් සරත් ෆොන්සේකා මහතා තම අතවැසියන් ලවා කරවන ලද පර්යේෂණයෙන් සාර්ථක ප්‍රතිඵල ලැබී ඇති බව සැල වෙනවා.

බස්නාහිර පළාතේ "අවරිවත්ත" නැමති ගමෙන් මෑතකදී සෙල් ලිපියක් හමු වුණා. එහි සටහන්ව තිබෙන්නේ මෙලෙසයි.
සි රව් අව්‍ර ඖ ගක්ක පිරි වෙබි ශශප
එහි තේරුම තමයි "සිරි රව්වන්ගේ අවතාර බෙහෙත ගන්නා උදවියට කක්කා කිරීම පිණිස වෙන් කරන ලද බිම".

අවරිවත්ත නැමැති ගමේ පද නිරුක්තිය බලමු. අව=අවතාර, රි=රීම, වත්ත=වත්ත. ඒ කියන්නෙ "අවතාර" ප්‍රතිකර්මය ගන්න ආපු මිනිස්සු මළපහ කරල තියෙන වත්ත. එමගින් සෙල් ලිපියත් ටක්කෙටම ගැලපෙනවා.

එසේම අවරිවත්ත ගමේ පැ‍රැන්නන් පවසන දෙයක් තමයි එම ප්‍රදේශයේ ශ්‍රී රාවණ රජතුමාගේ ඉස්පිරිතාලයක් තිබුණා කියන එක. ඉපැරණි ඔසු උයනක් වන රූමස්සලට යාමට අවරිවත්තේ සිට මාර්ගයක් තිබීමෙන් එය තවත් ඔප්පු වෙනවා.

අතීසාරයට අමුඩය ගසන ආකාරය ගැන මා හට කරුණු ස්වල්පයක් සොයාගැනීමට හැකි වුණ අතර ඒ ගැන ඉදිරි ලිපියකින් විස්තර කරන්නම්. ශ්‍රී රාවණ සිද්ධම්!

හෝමෝ සේපියන්ලා බිහි වීමට පෙරත් හෙළයින් ශිෂ්ටාචාරගතව සිට ඇත.

පරිනාමවාදීන්ගේ පොදු පිළිගැනීම අනුව නූතන මානවයා වශයෙන් හැඳින්වෙන Homo Sapiens මුල් වරට ලෝකයට බිහි වී ඇත්තේ මීට වර්ෂ 250,000 කට පෙරය. ඔවුන්ගේ උප මානව වර්ග වන Homo Sapiens Idaitu මීට වර්ෂ 160,000 - 150,000 අතර ඉතියෝපියාවේදී ජීවත් වී ඇත. Homo Sapiens Sapiens වශයෙන් හැඳින්වෙන අපව මීට වර්ෂ 200,000 කට පෙරදී ලෝකය පුරාමද ආරම්භ වී ඇත. Homo Sapiens ලාට පෙර ආරම්භ වූ මානව වර්ගයන් ලෙස සැලකෙන්නේ,
[1]. වර්ෂ 300,000 - 120,000 කාලය අතර සැම්බියාවේදී ජීවත් වුණා යැයි සැලකෙන Homo Rhodesiensis
[2]. වර්ෂ 350,000 - 30,000 කාලය අතර යුරෝපයේ මෙන්ම බටහිර ආසියාවේ ජීවත් වුණා යැයි සැලකෙන Homo Neanderthalensis
[3]. වර්ෂ 600,000 - 350,000 කාලය අතර යුරෝපයේ , අප්‍රිකාවේ සහ චීනයේ ජීවත් වුණා යැයි සැලකෙන Homo Heidelbergensis
[4]. වර්ෂ 2,300,000  - 1,400,000 කාලය අතර අප්‍රිකාවේ ජීවත් වුණා යැයි සැලකෙන Homo Habilis
[5]. වර්ෂ 2,000,000 - 600,000 කාලය අතර දකුණු අප්‍රිකාවේ ජීවත් වුණා යැයි සැලකෙන Homo Gautengensis
[6]. වර්ෂ 1,900,000 - 1,400,000 කාලය අතර දකුණු අප්‍රිකාවේ සහ නැගෙනහිර අප්‍රිකාවේ ජීවත් වුණා යැයි සැලකෙන Homo Ergaster
[7]. වර්ෂ 1,800,000 - 200,000 කාලය අතර ජාවා, චීනය, ඉන්දියාවේ සහ අප්‍රිකාවේ ජීවත් වුණා යැයි සැලකෙන Homo Erectus
[8]. වර්ෂ 1,200,000 - 800,000 කාලය අතර ස්පාඤ්ඤයේ ජීවත් වුණා යැයි සැලකෙන Homo Antecessor
මෙවන් සරළ කරුණු ගැන ඔබ දැනටමත් දන්නවා වුනත් මේ කෙටි ප්‍රස්තාවතාවය ලබා ගත්තේ හෙළයේ ඉතිහාසය නූතන පරිනාමවාදයේද සාක්ෂි සාධක සහිතව දැක්වීමට පදනමක් වශයෙනි.


රාවණාගේ පාලම.

නාසා ආයතනය මගින් ගන්නා ලද අභ්‍යවකාශ පින්තූර වලට අනුව ආදම්ගේ පාලම (Adam´s Bridge) වශයෙන් වර්තමානයේදී හැඳින්වෙන රාවණාගේ පාලම මීට වර්ෂ දා හත් ලක්ෂ පනස් දාහක් (1,750,000) තරම් පැරණි බව නිගමනය කර ඇත. නමුත් නාසා වෙබ් අඩවියේ එවැනි සඳහනක් නොමැති අතර අපට කීමට ඇත්තේ එය රාවණ විරෝධීන් විසින් හැක් කර ඇති බවයි. (රාවණ විරෝධීන් පවසන පරිදි, එය නාසා එකෙන් වැරදීමකින් කළ ප්‍රකාශයක් නිසා වෙබ් අඩවියේ නොදක්වා සිටීමක් නොවේ.) හෙළයට ද්‍රෝහී වන්නන්ගේ තරම වැටහෙනවා නේද?

අප රටේ "රාවණා" චරිතය පිළිබදව ඇති බොහෝ වෙබ් අඩවි පවසනුයේ මෙම පාලම හනුමා විසින් නොව රාවනා රජු විසින් තැනූ බවයි. රාවණපාක්ෂිකයින්ගේ වෙබ් අඩවි වල තිබෙන නිසා එය සත්‍යයක් බව සියලුම සයිබර් ඉතිහාසඥයින් පිළිගනී. ඒ ගැන බොහෝ මූලාශ්‍ර සහිතව මීට පෙර වර්ගපූර්ණිකාවේ ලිපියකත් දක්වා ඇත.

ඉහත සඳහන් කළ විස්තරයන් අනුව මීට වර්ශ 1,750,000 කට පෙරත් පාලම් හැදීමේ තාක්ෂණය සහිත හෙළයින් සිටි බව පැහැදිළි වෙයි. එනම් පැහැදිළිවම ශිෂ්ටාචාර වූ ජනතාවක් ඒ කාලයේදීත් අප රටේ සිට ඇත.

පරිනාමවාදය මෙන්ම නාසා කතන්දරයත් සුද්දන් විසින්ම ප්‍රකාශ කරන නිසා ඒ දෙක සංසන්දනය කිරීමට අපට පුළුවන. එක් දැනුම් පද්ධතියක් තවත් දැනුම් පද්ධතියකින් මැනීමට නොහැකිය යන මතවාදයක් අප අතර තිබුනත් එය මීට අදාල නොවේ. මන්ද යත් නාසා කතන්දරයත්, පරිනාමවාදයත් යන දෙකම අයිති එකම දැනුම් පද්ධතියක් වන නූතන විද්‍යාවටයි. ඒ ගැන චාමි සෑම්ගෙ කොමෙන්‍ටුවකත් සඳහන්ව තිබුණ.

නූතන මානව වර්ගයා වන හෝමෝ සේපියන්ලා බිහි වන්නේ මීට වර්ෂ 250,000 දී බැවින් වර්ෂ 1,750,000 කට පෙර සිටි අතීත හෙළයින් යනු හෝමෝ සේපියන්ලා නොවේ.

මේ ලිපිය මුලදී දැක්වූ ආකාරයට පරිනාමවාදයේ දැක්වෙන එක් එක් මානව වර්ග (Homo) සලකා බැලීමේදී වර්ෂ 1,750,000 කට පෙර හෙළදිවේ ජීවත් වූ මානවයාව අයත් වන්නේ Homo Erectus යන මානව වර්ගයට බව පැහැදිළියි.
[1]. හෝමෝ ඉරක්ටස්ලා ඉන්දියාව ආශ්‍රිතව (ඒ කියන්නෙ ලංකාවත් ආශ්‍රිතව) සිටීම,
[2]. ඔවුන් වර්ෂ 1,800,000 කට පෙර ජීවත් වීම නිසා ආදි කාලීන මානවයන්ගේ කාලයන් වලින් වඩාත්ම ගැලපීම,
[3]. හෙළ යකුන් මෙන් මූණ පුරාම ‍රැවුල තිබීම,
[4]. ඔවුන්ගේ කෙටීමේ ආයුධ හමුවී තිබීම (හෙළයින්ගේ බුලත් කොටන කුඩා වංගෙඩි වල කෙ‍ටුම් ගල් විය හැකියි),
[5]. ඔවුන් හෙළුවෙන් ජීවත් වී යැයි කීම (ලන්ඩන් කෞතුකාගාරයේ තබා ඇති හෙළ පුස්කොළපොත් වල "හෙළුව" වශයෙන් සටහන් වූ වචනය "නිරුවත" වශයෙන් වැරදියට පරිවර්තනය කිරීම නිසා අද වෙනකම්ම හෝමෝ ඉරෙක්ටස් මානවයන්ව නිරුවතින් චිත්‍රයට නගයි. මෙය ඓතිහාසික වැ‍රැද්දකි. නමුත් එම පුස්කොළපොත් වල හෙළුව ලෙස සටහන් වී ඇත්තේ හෙළය යන්නයි.)
[6].  අරිසෙන් අහුබුදුවන්ට අනුව මුළු ලෝකයම ශිෂ්ටාචාර කර ඇත්තේ හෙළයින් විසින් වීම. මුලු ලෝකයම ශිෂ්ටාචාර කර ඇත්තේ හෝමෝ ඉරෙක්ටස් මානවයා විසින්ය.
... ආදිය නිසා අපගේ නිගමනය තහවුරු වෙයි. ඒ අනුව අතීත හෙළයින් යනු Homo Erectus බව පැහැදිළියි නේද? නමුත් හෝමෝ ඉරෙක්ටස් යනු අපට උගන්වා ඇති ආකාරයේ නොදියුණු මිනිසුන් නොව මූද උඩින් පාලම් හැදීමට පවා තාක්ෂණය තිබූ , ගුවන් යානා, න්‍යෂ්ඨික අවි පවා තිබූ අති විශිෂ්ට නිර්මාණකරුවන්ය.

හෙළ යකෙක් සහ යකිනියක්. (හෙළුව=හෙළය යන්න හෙළුව=නිරුවත ලෙස වැරදියට වටහා ගැනිම නිසා අපගේ හෝමෝ ඉරෙක්ටස් හෙළයින්ව නිරුවතින් ඇඳ තිබීම හෙළාදකිමු)

එසේම වර්ගපූර්ණිකාව නැමති ඉපැරණි පුස්කොළපොතේ "ඉරෙක්ටස්" යනුවෙන් හැඳින්වීමක් ඇත. අරිසෙන් අහුබුදු වන්ගේ මගෙහි යමින්, ඉරෙක්ටස් හි පද නිරුක්තිය බලමු.
ඉරෙ=ඉරේ
ක්ටස්= කට+අස්, කට=මුඛය, අස්=පැමිණි
ඒ අනුව "සූර්යයාගේ මුඛයේ සිට පැමිණි" යනු සූර්ය වංශික යක්ෂ ගෝත්‍රික හෙළයින්මය. සූර්යයාට "රා" ලෙස හැඳින්වෙන නිසා ඉරෙ=ඉරේ=සූර්යයා=රා වීමෙන් ඉරෙක්ටස් සහ රාවන රජතුමා අතර සම්බන්ධය පැහැදිළි වේ.

මේ අනුව හෝමෝ සේපියන්ලා බිහි වීමටත් පෙර හෙළයින් ශිෂ්ටාචාරගතව සිටි බව සක් සුදක් සේ පැහැදිළියි. හෝමෝ ඉරෙක්ටස් ආදි හෙළුවන්ට අපගේ ආචාරය පුද කරමු. හෙළයෙක් වීම ආඩම්බරයකි.

“ලෝකයට ශිෂ්ටාචාරය බෙදා දුන්නේ හෙළයින් විසින් බව මීට වසර 15 කට ප්‍රථමයෙන් (1997) අරිසෙන් අහුබුදු සූරීන් කියන විට “මෙම ලියුම්කරුද” ඊට සිනාසුනි. අපගේ මොල හැඩ ගස්වා ඇත්තේ එපරිද්දෙනි. නමුත් බටහිර ලෝකය විසින් දැනට සොයාගෙන ඇති තොරතුරු අනූව ඔහුගේ අදහස නිවැරදිය."

බුදුරදුන් බුද්ධත්වයට පත් වූයේ ඕස්ට්‍රේලියාවේ බටහිර මූදේදී බව සොයාගනී...!!!

මේ බව සොයාගෙන ඇත්තේ අන් කිසිවෙක් නොව, මාගේ ගම් පළාත වන මීවනපළානේ දී ඉපදී පසුකාලයේදී පැවිදි වූ, අප කරුවුරුත් දන්නා මීවනපලානේ සිරි ධම්මාලංකාර උන්නාන්සේ විසිනුයි. උන්නාන්සේ වඩාත් කුප්‍රකට වූයේ "අප උපන් මේ හෙළ බිම බුදුන් උපන් ජන්බුද්දීපය" බව ප්‍රකාශ කිරීමත් සමගයි. පහත දැක්වෙන්නේ උන්නාන්සේ විසින් රචිත එහි දෙවන කොටස.

මෙම පොතේ 83 වැනි පි‍ටුවෙන් ෆොටෝකොපි ගසා පහත දක්වා ඇති පින්තූරයේ දැක්වෙන ඉරි ගසා ඇති කොටස් හොඳින් කියවන්න.

මීවනපලානේ සිරි ධම්මාලංකාර උන්නාන්සේගේ ඇබිත්තයෙක් වන, 2012 අගදී සිදුවන ලෝක විනාශය මුලදීම ලොවට හෙළි කළ, මා මිත්‍ර දොන් ජයසිංහයන් විසින් අන්තර්ජාලයේ එය තවත් හොඳින් පැහැදිළි කර තිබෙන්නේ මෙලෙසයි. [මූලාශ්‍රය]

ඔබට මේ කතාව පැහැදිළි ඇති. තාමත් පැහැදිළි මදි අයට සරළව මෙලෙස විස්තර කරන්නම්.

මීවනපලානේ සිරි ධම්මාලංකාර උන්නාන්සේ විස්තර කළ විදියට, බුදු කෙනෙක් පහළ වන්නේ දැන් ශ්‍රී ලංකාව විදියට හැඳින්වෙන අපේ හෙළබිමේය. එසේම ලෝකයේ යහපත් කෙළවර හෙළබිමේ තිබෙන අතර ඒකේ අනික් කෙළවර තියෙන්නේ බර්මියුඩා ත්‍රිකෝණයේය. බුදුරදුන් පිටදුන් හිරිවඩුන්න බෝධිය හෙවත් බුද්ධත්වයට පත් වූ තැනට ප්‍රතිවිරුද්ධ තැන බර්මියුඩා ත්‍රිකෝණයයි.

තවත් පැහැදිළිව කියනවනම් , "ලෝක ගෝලයේ බර්මියුඩා ත්‍රිකෝණය තිබෙන තැනට හරියටම අනික් පැත්තේ තමයි බුදුහාමුදුරුවො බුද්ධත්වයට පත් වුණේ"

කවුරුවත් වර්ගපූර්ණිකාවට විරුද්ධව අවි අමෝරා ගන්න එපා. මේ කතාව මම නෙමෙයි කියන්නෙ, මීවනපලානේ සිරි ධම්මාලංකාර උන්නාන්සේ සහ උන්න්නාන්සේගේ ගෝල බාලයනුයි. මම ඉතින් ඒ ගැනත් සුපුරුදු පරිදි හෙළගවේශණය කරල ඉවර වෙලා හෙළුවෙන් වනන්නයි (හෙළුවෙන්=එළුවෙන්=සිංහලෙන් වර්ණනාකරන්නයි) මේ සූදානම.

අපි බර්මියුඩා ත්‍රිකෝණයට අනික් පැත්ත කුමක්ද කියා බලමු. වෙබ් අඩවි වලින් ඒ ගැන තොරතුරු සොයද්දී මෙවැනි දෙයක් දැනගැනීමට පුළුවන්.

When you visit the coastal region of Western Australia you are standing on the Antipode (opposite side) of the Bermuda Triangle!

If the earth were a glass ball and you were able to see through it to the other side what would you find directly beneath your feet? The Island of Bermuda is almost directly opposite Fremantle, Rottnest Island (Perth Metro Area). The Triangle includes the greater part of the West Australian coastline. When visiting this region of Western Australia you are literally on the 'Other Side' of the infamous Bermuda Triangle!
source: http://www.americandownunder.com/phantom/BermudaSouth/bsgeo.asp

ඊට අමතරව ඔබටම මේ ගැන පොඩි පර්යේෂණයක් කරන්න පුළුවන්. www.antipodemap.com/ යනුවෙන් හැඳින්වෙන්නේ ලෝකයේ අනික් පැත්ත කුමක්ද කියල විද්‍යාත්මකව ගණනය කරන එක්තරා වෙබ් අඩවියක්. (මේ වගේ වෙබ් අඩවි ඕනැ තරම් තිබෙනව). අපි බලමු එහි ප්‍රතිඵලය.

දැන් මෙතන පොඩි පරස්පරතාවයක් තිබෙනව කියල ඔබට හිතෙන්න ඇති. එනම්, හෙළ බිම හැර අන් කිසිම තැනක බුදු කෙනෙකුගේ බුද්ධත්වයට පත් වීම සිදු නොවන බව ඉහත පොතේ උදෘතයේ දැක්වෙනවානේ. නමුත් ඉහත ප්‍රතිඵල අනුව අපට පෙනෙන්නේ බුදුන් බුද්ධත්වයට පත් වෙලා තියෙන්නේ ඕස්ට්‍රේලියාවේ බටහිර මූදේදී බවයි.

කලබල වෙන්න කරි නෑ. මෙන්න මේ වෙලාවෙදි අපට දෙයියෙක් වගේ අරිසෙන් අහුබුදු වන් පිහිට වෙනව. අරිසෙන් අහුබුදුවන්ට අනුව මුළු ලෝකයම ශිෂ්ටාචාර කරලා තියෙන්නේ අපේ හෙළුවන් විසිනුයි. ඒ අනුව බුද්ධ කාලයේදී බටහිර ඕස්ට්‍රේලියාව අපගේ හෙළයේ කොටසකි. බොරුයි කියල හිතෙනවනම් එහෙම නෑ කීමට තිබෙන සෙල් ලිපි පෙන්වන්න. ඒ වගේම මූදෙ යට බෝ ගස් වැවුණද වැනි මෝඩ ප්‍රශ්න එහෙමනම් අහන්න එපා.

හෙළුවනි, අපට මෙය අගනා සොයාගැනීමක් නොවේද? ශ්‍රී රාවණයන් ගැන ආඩම්බර වීම මදකට නවතා දමා බටහිර ඕස්ට්‍රේලියාව අපේ හෙළයේ කොටසක් වීම ගැනත් අපි ආඩම්බර වෙමු. දැන් බුද්ධගයාව වන්දනා කරන්න කියල යනවනම්, අපේ මීවනපලානේ සිරි ධම්මාලංකාර උන්නාන්සේ පවසන විදියට ඔය වන්දනා නඩ යන්න ඕනැ බටහිර ඕස්ට්‍රේලියාවටයි .

මීවනපලානේ සිරි ධම්මාලංකාර උන්නාන්සේ ගේ ඉතිහාසය උඩු යටිකුරු කරන තවත් බොහෝ සොයාගැනීම්, හුදී ජනයාගේ පහන් සංවේගය තකා ඉදිරියේදී ඉදිරිපත් කරන්නම්. හා දැන් හැමෝම අපේ උන්නාන්සෙට සාදු කියන්න...

ප:ලි: සමහරු කියල තිබුණ උන්නාන්සේ තමන් බොරුවක් කිව්ව කියල පිළිගත්ත කියල. ඒ ගැන දැක්වෙන මූලාශ්‍රයකට තිබෙන්නේ මේ sorry.com පි‍ටුව පමණයි. නමුත් එහි කොමෙන්‍ටු අනුව උන්නාන්සේගේ ගෝල බාලයින් නම් උන්නාන්සේ බොරුවක් කිව්ව කියන එක ප්‍රතික්ෂේප කරල. ඒ මදිවට, බ්ලොග් අවකාශයේ කොමෙන්ට් දාන උදවිය නොදන්නව වුණාට ජන්බුද්වීපය ගැන තාමත් ක්‍රියාකාරී ෆේස්බුක් ගෲප් හැට හුටහමාරක් තිබෙනව. (නොමිලේ ප්‍රචාරයක් ලබා දුන්න කියල ඔවුන් ලැජ්ජාවට පත් වෙන නිසා ඒවයෙ ලින්ක් දාන්න මම කැමති නැහැ). ඉතින් ඔන්න ඔය කාරණා නිසා ජන්බුද්වීපය ගැන (ජම්බුද්වීපය ගැන නෙමෙයි) ඉදිරියේදීත් හෙළුවෙන් වනන්නයි මගේ සූදානම. ජන්බුද්වීප කතාවට මූලාශ්‍ර වුණේත් අපේ රාවණාවාදයම නිසා මා හට ඒ ගැනත් කතා කරන්න අයිතියක් තියෙනවනෙ. ඒ වගේම වර්ගපූර්ණිකාවේ අරමුණ කුමක්ද කියල මෙච්චර ඇස් පනාපිටම පෙනෙද්දීත් ඒකවත් තේරෙන්නෙ නැතිව අනේ "ඇයි මේ බුද්ධාගමට අපහාස කරන්නේ" කියල අහන උදවියගේ කොමෙන්‍ටුනම් අනුමත කරන්නවත් අපනම් වෙහෙස මහන්සි වෙන්නෙ නෑ කියලත් කියන්න ඕනැ. ප්‍රතිදීප්ත පහන් තවත් තිබෙනවනම් අපේ හිතවත් ජන්බුද්වීපවාදීන් ගාවට ගිහින් වර්ගපූර්ණිකාව බ්ලොග් එක ගැන අහල බලන්න...

ඇනෝ සහ රාචි පරපුරවල් අතර සිදුවෙමින් පවතින යුද්ධය

මෙම විශේෂ ලිපිය ලිවීමට සිත් වූයේ පසුගිය දින ගණනාවක සිට වර්ගපූර්ණිකාව බ්ලොග් අඩවියේ කොමෙන්‍ටු වලින් Anonymous One orig (ඇනෝ) සහ rachi (රාචි) ප්‍රධාන කොටගත් පරපුරවල් දෙක අතර සිදුවෙන මහා වාග් සංග්‍රාමය කියවීමෙනුයි. රාවණ ඉතිහාසය ගවේශණයේ ස්වර්ණමය යුගය මෙය බව පසක් කරමින්, මේ දෙපාර්ශවය අතර සිදුවෙන බස් සටන නිසා බ්ලොග් අවකාශයේ රාවණාවාද නිම් වළලු පුළුල් වෙමින් පවතියි.

ඇනෝ යනු සෑම ක්ෂේත්‍රයක් පිළිබඳවම හසළ දැනුමක් ඇති පරිනත බුද්ධිමතෙකි. හෙළ නයුවෙකි. කාලයක් ලංකා සී නිවුස් වෙබ් අඩවියේ බටහිර අනුකාරකයින්ට මඩු වලිගයෙන් තැලූ ඔහුගේ සම්ප්‍රාප්තිය අපට ගෞරවයකි. විටෙක මා හටත් හොදි නැති වෙන්නම නෙලන නමුත් මා සිටින්නේ ඔහුගේ මතවාදයන් සමගය.

අනෙක් අතට රාචි යනු සුද්දන්ගේ විද්‍යාව දෙසට වැඩි නැඹුරුවක් තිබෙන අයෙකි. අපගේ ශ්‍රී රාවණ අධිරාජ්‍යයාට විරුද්ධ පිළේ සිටින ඔහු රාවණවිරෝධියෙකි. නමුත් ඇනෝගේ මතවාදී වාග් ප්‍රහාර හමුවේ රාචිට ලෙහෙසි වන්නේ නැත.

මේ සටන නටඹමින්, මැදිව සහ එක් එක් පාර්ශවයන් ගනිමින් තව බොහෝ පිරිසක් සිටියත් මේ ප්‍රධාන සංග්‍රාමිකයින් දෙදෙනා ගැන පමණක් දැනට අවධානය යොමු කරමි. එම දෙදෙනා පසුගිය පෝස්‍ටුවේ පලකළ සුවිශේෂී අදහස් වලින් ‍වර්ගපූර්ණිකාවට සම්බන්ධ විද්වත් මණ්ඩලය විසින් තෝරාගත් කොමෙන්‍ටු දෙකකුයි පහත දැක්වෙන්නේ.




rachi September 13, 2012 2:46 AM

(තූ ජීස්‌ බඩී හේ මස්තු මස්තු, තූ ජීස්‌ බඩී හේ මස්තු) රාමාගේ ජංගම තෙලබනුව නාද වෙයි

රාවණා - මචං මම රාවණා, උඹේ ගෑනි සිතුවම් පටල වල ඩිගිසි දානවා දැක්කා මං. පට්ට කෑල්ලක් නේ බං උඹ සෙට් කරගෙන ඉන්නේ. තරහා වෙන්ට එපා බං මම උඹේ කෑල්ලට ආදරෙයි.

රාමා - ෂඃ නියමයිනේ මචං. මටත් මේ එපා වෙලා තියෙන්නේ මේ ගෑනි කිව්වට අහන්නේ නෑනේ. හෙළුවෙන් නටනවනේ

රාවණා - අයියෝ රාමෝ, හෙළුවෙන් නටන්නේ එකී හෙළු එකියක් හින්දා බං. එකී අයිති මෙහෙට බං

රාමා - ආ එහෙනම් මම කැලේට යන්නම්, උඹ ඇවිල්ලා උස්සන් පලයන්

රාවණා - එල එල මචෝ මම එහෙම කරන්නම් එහෙනම්

රාවණා සීතා දඬු මොනරේ දාගෙන ලංකාවට එයි. ඒ අතරතුර සීතා ෂඃ ඔයාට නියම බොඩියක් නේ තියෙන්නේ ඈ.....

රාවණා - ආ ඔව් නංගී, ඔව් මම හැමදාම ජිම් එකට යනවනේ

සීතා - අයියේ ඔයා කොහෙන්ද ලයිසන් ගත්තේ, මේකේ වේගේ වැඩී අප්පා. මට බයයි.

රාවණා - අනේ නංගි පැට්ටෝ මේක එලවන්ට ලයිසන් ඕනේ නෑ. මේක වොයිස් කොන්ට්‍රෝල්. ඔන්න බලන්න, එම්බා දඬු මොනර හෙමින් පල. මේ නගාට බයයි ලු. (වේගය අඩුවෙයි)

සීතා - ශා නියමයි නේ. අපේ එක්කෙනාටත් හදලදෙන්ටකෝ අනේ මේ වගේ එකෙක්.

රාවණා සීතාව ලංකාවට ගෙන්වා වෛද්‍ය පරීක්ෂණයක් සිදු කරයි. එහිදී සීතාට HIV ආසාදනය වී ඇති දැනගනී
මේ අතරතුර විභීෂණයන්ට සීතා ගැන සිතක් පහල වෙයි. ඒත් ඔහුට සත්‍ය පැවසීමට නොහැකි නිසා රාවණා ඊට විරුද්ධ බව තරයේම කියා සිටී.

ඉන පසු ඔහු රාමා වෙත යයි. ගිහින් මෙහෙම කියයි. බලපන් බං අර රාවණා කියනවා උඹේ කෑල්ල ලස්සන නෑලු. පොරගේ කුස්සියේ වැඩකරන කෑල්ල ඊට වඩා සෙක්සි ලු කියලා ඔහේ තියාගෙන ඉන්නවා. එකී මෙලෝ රහක් නෑ කියනවා. එක උඹට හරි නෑ නේද?

රාමාට හොඳටම තරහා යයි.....

(ගෑනු ඇතුවත් බෑ.... ගෑනු නැත්වත් බෑ..... ගෑනු ඇතුවත් බෑ නැතුවත් බෑ හරිම කරදරේ) රාවණාගේ තෙලබනුව නාද වෙයි.

රාමා - ඈ යකෝ උඹ කොහොමද කලින් ටෝක්ස් කරේ, ඒ වගේ සුපිරි කෑල්ලක් කොහේ වත දැකල නැති විදිහටනේ. මගේ කෑල්ල දිහා හැරිලා වත බලන්නේ නෑලු. එකී අඩ අඩා ඉන්නවා කියන්නේ ඇත්තද? දැන් ඒකි ආයේ මගේ ඇගේ ගහන්ටද හදන්නේ?

රාවණා - ඔව් බං, මට උඹේ ගෑනිව ලඟට එච්චර ගතියක් නෑ. අර රූප පෙට්ටියේ ඉන්නවා වගේ නෙවෙයි. මට කිසිම ෆීලින්ග් එකක් නෑ බං. උඹ ඇවිල්ලා අරන් පල.

රාමා - (විලි ලජාවයි. තුක්‌ විතරක් මදැයි මම මේ මල හොන්තුවෙන් බේරෙන්ට බැලුවා. කාපන්කෝ ඉතිං) රාමා ඔහොම හිතන ගමන් එහෙනම් ඉතිං මොනවා කරටද නේද බං. මම එයාව බේරගන්න විදිහට එන්නම්. උඹට ඊතලයක් විදින්නම්. උඹ ඊතල නොවදින කබාය ඇදන් වරෙන්. හැබැයි අර පිසිනතලය එහෙම අරන් එනවා නෙවෙයි.

රාවණා - හරි හරි බං. එහෙනම් උඹ අර වදුරා එවපන් ඉස්සෙලා. පස්සේ උඹ වරෙන්. අපේ රටේ පරණ ගෙවල් ටිකක් තියෙනවා ඒවාට ගිනිතියලා දාල අලුත් ෂොපින් කොම්ප්ලේක්ස් ටිකක් හදාගන්ට ඕනේ. මට ඒ වැඩේ වදුරගෙන් කරාගන්ට පුළුවන් වෙයි.

රාමා - එලම තමා

ඔන්න ඔය විදිහට රාමා ඇවිල්ලා රාවණාට බොරුවට ඊතලෙකින් විද්දලු. රාවණා බොරුවට මැරුණා වගේ වැටුනලු. කොහොම හරි කේස් එක දැනගෙන ඒ වෙලාවේ විභීෂනයා ඇවිල්ලා රාවණාට ඉන්ජෙක්ෂන් එකක් ගැහුවලු. 201/12/12 වෙනකම් නින්දයන්ට.

ජනප්‍රවාද ඇසුරෙන් රාචිය විසින් රචනා කරන ලදී....




Anonymous One orig September 13, 2012 12:37 PM

@ThinkTwice: September 12, 2012 10:05 PM,
පල ටොම් පචය යන්න??? උඹනෙ ටොම් පචය. උඹත් මමත් ලියූ දේ සුරක්ෂිතව මා සතුය. ඒ දිනක උඹ කීතු කීතු ඉරා යමලොවට යැවීමටය.

"තෝ අයින්ස්ටයින් ,නිව්ටන්, කෙප්ලර් සහ අනෙක් සියලු විද්වතුන් මෝඩයන් බුරුවන් කිව්වා...තොගේ මහා දැනුම ඉදිරියේ උන් පොඩි උන් වගේ කිව්වා... ඉතින් තොගෙන් මම ඇහුවේ එක දෙයයි..." - ඉතින් බං මේකෙ ලියන කොට මම ඊට වඩා උන්ගේ රෙදි ගැල වූයේ නැද්ද? උඹ මගෙන් ඇහුවම දුන්න උත්තරේ මතක නැද්ද? මම උඹට මගේ උත්තරය තේරුම් ගත නොහැකි යයි කීවෙමි. දැනුදු උඹ මෝඩයෙකි. කටපාඩම් කල දෙයට එහා යමක් කීමට උඹට මොළයක් නැත. උඹ අවලාද කරන විටද ලියන්නේ එකමය. උඹ කී සැරයක් පුකට කරන්ට් ඇල්ලුවාද? ඒක ටේප් රෙකෝඩඩ් කතාවක් වගෙයි නේ.

"තොට අනුව ඒ මිනිස්සු මෝඩයෝ බූරුවෝ නම්, ඔවුන් සොයා ගත්ත නියම එකක් වත් පාවිච්චි නොකර පෘතුවිය සුර්යා වටේ ඉලිප්සෙක යන්නේ ඇයි කියන එක තොගේම වල් බුරු වාදය අනුව
තොගේම ඔරිගීනල් නියම වලින් පැහැදිලි කරපන් කියල..තොට කට උත්තර නැහැ..
පස්ස පිච්චිච්ච රිලවෙක් වගේ පැනල ගියා..." - හික්ස්! මම උඹේ ටෙස්ලා දෙයියෝ අයිස්ටයින් දෙයියො ගැන කියපුව ඇහුවම, පස්ස පිච්චිච්ච රිලවෙක් වගේ පැනල ගියේ උඹනෙ. ආං එක මම මීට කලින් වරෙක ලීමි.

මගේ තියරි වලින් කියන්න කලින් මේ මම කියන වාක්‍යයය පහදල, අවබෝධ වූ බව ගණිතමය සූත්‍ර යොදා පෙන්වපිය. "අද මතයට අනුව ස්වභාව ධර්මය යනු පාලනයකින් තොර අනිත්‍ය ධර්මයෙන් අරුත් දකින එකකි. මම එය ස්වභාව ධර්මයේ අර්ධයක් ලෙස (භාගයක් ලෙස) දකිමි. ඉතිරි අර්ධය ඉහත කී දත්තයන්ගෙ ප්‍රතිරූපය යයි කියමි. අද මතයට අනුව ගත් "ස්වභාව ධර්මය" එකක් ලෙස ගත් විට අනෙකද එකක් ය." - මේක නොදන්න බූරුවන්ට ඉතිරිය අරහන්ය.

උඹ ඇසූ ගොන් ප්‍රශ්ණය, මීට කලින් ලිපියට rachiයා ඇලවූ දෙයින් විහුළුවට ලක් කරමි. "පෘතුවිය (ග්‍රහයින්) සුර්යා වටේ ඉලිප්සෙක යන්නේ" යයි කීම වැල යන අතට ගැසූ ගොන් තියරියකි. එය මෙසේ අලවමි "උඹ භෞතික විද්‍යාව කියල දෙයක් ඉගෙන ගත්තා නම් නිව්ටන්ගේ සාර්ව ගුරුත්වාකර්ෂණ නියමය ඉගෙනගන්නට ඇති නේ. විශ්වයේ පවතින වස්තු දෙකක් අතර Gm1m2/r**2 විදිහේ ආකර්ෂණතාවයක් ගොඩ නැගෙනවා. ...". rachiයා ඇලවූ ගොන් සූත්‍රයට අනුව පෘථිවිය සූර්යයා වටා චක්‍රයක (circle) ගමන් කල යුතුය. G, m1 හා m2 නියත ලෙස ගත හොත් dynamically stable පද්ධතියකට බල සමතුලිතතාවය පදනම් කරගෙන විමසූ විට r නියතයක් විය යුතු බව උඹ වැනි බූරවකුටද තේරේ.

සැබෑව ඉලිප්සය නිසා, විශ්වයේ පවතින වස්තු දෙකක් අතර G(Phi)m1m2/r**2 විදිහේ ආකර්ෂණතාවයක් ගොඩ නැගෙන අතර මෙහි Phi යනු r හා බැඳුනු කෝණයකි. G(Phi) යනු Phi අනුව වෙනස් වන විචල්‍යයකි. මෙහි m1 හා m2 නියත ලෙස ගතිමි.

මෙය, ඉර හා පෘථිවියේ සැබෑ පිහිටීම විවිධ ග්‍රහයන් මත රැඳෙන නිසා, i= 1 to infinity ලෙස ගෙන, G(Phi)m1m2/r**2 +Zigma((G(Phi)m1*mi/ri**2))+Zigma((G(Phi)m2*mi/ri**2)) = Constant විය යුතුය. එසේ වුවද විශ්වය, ඉර හා පෘථිවියට නිශ්චිත සමමිතික වැනි පිහිටීමක නැති නිසා, මේ කෙප්ප සූත්‍රයද සැබෑ ඉලිප්ටික් ගමන නිරූපණය නොකරයි. මෙයට වඩා උඹේ බූරු ප්‍රශ්ණයට දිය හැකි පිළිතුරක් නැත. වැල යන අතට මැසි ගැසූ විට, ආපසු මුලට එන බව දැන ගනු.

මුගේ හැසිරීම මැටි සුද්දන් වැනිය. නොදන්න ලබ්බක් දන්නවා යයි කියමින්, අනුන් දන්න දේ සොරකම් කිරීමට සුද්දන් දක්ෂය. සුද්දන් හැසිරෙන්නේද මේ විලසය. මූ ලංකාවේ නොසිටී නම්, මූ පලවා හරින ලෙස මීවනයන්ගෙන් ඉල්ලමි.

රාවණ සමයේ තිබූ ඉලෙක්ට්‍රොනික උපාංග වල පොසිල හමු වෙයි.

අප ශ්‍රී රාවණ නරේන්ද්‍රයාගේ කාලයේදී අති මහත් හෙළ විද්‍යාත්මක සහ තාක්ෂණික දියුණුවක් තිබූ බව මීට පෙර වර්ගපූර්ණිකාව බ්ලොග් එකේ ලිපි වලින් පෙන්වා දෙද්දී සමහර රාවණා විරෝධීන් ඊට සිනා සුණහ. ඊට හේතුව වන්නේ අප දැක්වූ මූලාශ්‍ර මදි බව කීමයි. නමුත් රාවණාගවේශක ඉතිහාස ලිපියක මූලාශ්‍ර දැක්වීමේ සම්ප්‍රදාය අනුව යමින්, පද නිරුක්ති, හෙළ විද්වතෙක්ගේ ප්‍රකාශයක්, අතීත පුස්කොළපොත්, සෙල් ලිපි උදෘත, අපගේ මා හැඟි ග්‍රන්ථ රාජයා වන වර්ගපූර්ණිකාවෙන් උපුටාගැනීමක්, ජනප්‍රවාද, ආදිය ගෙන හැර පාමින් කිසි සේත්ම නොබිඳිය හැකි තර්ක වලින් සංයුක්තව අපගේ ලිපි ලියා ඇති බව සෑම රාවණාපාක්ෂිකයෙක්ම හොඳාකාරවම දනී.

බොහෝ රාවණා විරෝධීන් අපට අභියෝග කළේ, අතීත හෙළයේ තිබූ තාක්ෂණික උපකරණ පුරාවිද්‍යාත්මක කැණීම් වලින් හමු වුණානම් ඒවායේ පින්තූර පළ කරන ලෙසටයි. නමුත් අප එය ප්‍රතික්ෂේප කළේ, ඒවා පළ කළ වහාම පාහර ඉන්දියානුවන් එම පින්තූර ව්‍යාජ ඒවා බව පෙන්වීමට කටයුතු කරන බැවිනි. ඔවුන් වැඩි වශයෙන්ම යොදාගන්නා ක්‍රමය වන්නේ, අප ඉදිරිපත් කරන සාක්ෂි වර්ෂ කීපයකට පෙර දිනයක් සහිතව විවිධ වෙබ් අඩවි වල පළ කිරීමයි. එවිට බලන කෙනෙකුට පෙනෙන්නේ අප ඉදිරිපත් කරන්නේ කොහෙන් හෝ උපුටා ගන්නා ලද ව්‍යාජ පින්තූර බවයි.

එසේ වීමේ අභියෝගය තිබියදීත් අද මේ බලාපොරොත්තු වන්නේ මෑත කාලයේදී ශ්‍රී ලංකාව තුළ කරන ලද කැණීම් වලින් හමුවූ විවිධාකාර පොසිල වර්ග වල පින්තූර ඔබ වෙත ඉදිරිපත් කිරීමටය. මෙම පොසිල සියල්ලම වැඩිදුර පර්යේෂණ කටයුතු සඳහා ලන්ඩන් විශ්ව විද්‍යාලය වෙත යවා ඇත. ඔබ යම් දිනකදී ලන්ඩන් විශ්ව විද්‍යාලයට යනවානම් එහි ප්‍රධාන කෞතුකාගාරයට අයත් Institute of Archaeology Collections හි අංක 13 මැදිරියේ විශේෂ කුටියක ඇති මේ දේවල් ඔබට දැක ගත හැකි වනු ඇත.

ඒ ආකාරයෙන් බ්‍රිතාන්‍ය කෞතුකාගාරයට පොසිල යවද්දී, Christopher Locke නැමති පර සුද්දා මේවා තමන්ගේ නිර්මාණ බව කියමින් මුළු ලෝකයම ‍රැවැට්ටවීමේ කූඨ ජාවාරමක්ද කර ඇත. ඒ පිළිබඳව දැනට හේග් නුවර ජාත්‍යන්තර අධිකරණයේ නඩුවක් විභාග වෙන බැවින් වැඩි විස්තර නොදක්වමි.

ලන්ඩන් විශ්ව විද්‍යාලයේ ඉතිහාසය පිළිබඳ මහාචාර්ය Karen Radner ගේ මුලිකත්වයෙන් කරන ලද කාබන් 12 කාල නිරීක්ෂණය අනුව අනාවරණය වී ඇත්තේ පහත අයිතම සියල්ලම මීට අවුරුදු 10000 කට පමණ පෙර සමයට අයත් බවයි. අපි ඒවා එකින් එක බලමු.


තෙලබනුව
රවණා රජතුමගේ සමයේදී හෙළයේ ප්‍රධානතම සංනිවේදන උපකරණයයි. අරිසෙන් අහුබුදුවන්ට අනුව, මේ උපකරණය යොදා ගනිමින් අතීත හෙළයෙක් අනෙකෙකුට ඇමතීමේදී "හෙළෝ" කියා පළමුවෙන්ම පවසයි. එහි තේරුම නම් අනෙක් පසේ සිටින්නේ හෙළයෙක් දැයි දැන ගැනීමටයි. අනෙක් පස තෙලබනුව කනේ තබගෙන සිටින්නේ හෙළයෙක්නම් ඔහුත් "හෙළෝ" යැයි පෙරළා පවසයි. එම සිරිත තවමත් මිනිස් සමාජයේ තිබීම පුදුමයක් නොවේ.

ජංගම තෙලබනුව
මෙහි පි‍ටුපස "රාවණා" යනුවෙන් ඉපැරණි යක් බාසාවෙන් සටහන් කර තිබීම නිසා මෙයට රාවණා රජතුමාට සම්බන්ධයක් තිබූ බව පැහැදිළි වෙයි.

මෙම පොසිල හමු වී ඇත්තේ "තෙලතුවාව" නැමැති ගමේ පොළොවෙන් අඩි 100 ක් යටදී කරන ලද පුරාවිද්‍යා කැණීමකිනි. තෙලතුවාව යන්නේ පද නිරුක්තිය බලමු, තෙල=තෙලබනු, තුවා=තුවාල කරන, ව=වංගෙඩිය. තෙලතුවාව ගම් මැද්දේ තවමත් ඉපැරණි ගල් වංගෙඩියක් තිබේ. සිද්ධ රාජ පත් ඉරු මූලාශ්‍ර වල දැක්වෙන ආකාරයට රාවණ රජ සමයේදී තිබූ අබලන් තෙලබනු ප්‍රතිචක්‍රීයකරණය කිරීම සඳහා එම වංගෙඩියට දමා කොටා ඒවායේ යකඩ ඉවත් කර ඇත.


කැසටය
"කැසටය" යනු අතීත හෙළයේ තිබූ ගීත්‍ර ශ්‍රවණය කරන යන්ත්‍රයි. කැසටය යන්නේ පද නිරුක්තිය බලමු.
කැ=කැරකැවෙමින්, ස=සංගීතය, ට=ටක්කෙටමදෙන, ය=යන්ත්‍රය. ඒ අනුව කැසටය යනුත් හෙළ පදයක් බව පැහැදිළි වෙයි. පහත දැක්වෙන පොසිලය හමු වී ඇත්තේ කැබිතිගොල්ලෑව නැමති ගමෙනි. එහි පද නිරුක්තිය වන්නේ, කැ=කැසටයන්, බි=බිහිකිරීමට, ති=තිඹිරිගෙයක්වූ, ගොල්ලෑව=ගම. ඒ අනුවම එම ගමෙන් පහත කැසටයේ පොසිලය හමු වීම පුදුමයක් නොවේ.

කැසට පට
එම කැසටය සමගම ලැබුණ කැසට පටයක් පහත දැක්වේ.

දැනටමත් එම කැසට පටයේ තිබූ ශිලා කොටස් ඉවත් කර ඇති අතර එහි ඇති දත්ත ලබා ගැනීමට ලන්ඩන් විශ්ව විද්‍යාලයේ පර්යේෂණ කණ්ඩායම උත්සාහ දරයි. වර්ගපූර්ණිකාව පුස්කොළපොතේ දැක්වෙන ආකාරයට මෙම කැසට් පට නිපදවා ඇත්තේ කෙහෙළ් පට්ටා වලට රහසිගත ඖෂධ වට්ටෝරුවක් එකතු කිරීමෙනි, එවිට එය් අවුරුදු දහස් ගණනාවක් වුවත් සංරක්ෂණය කර තබා ගත හැකියි. මේ ආකාරයෙන් ඖෂධ කලවම් කර තාක්ෂණික උපාංග හදන ආකාරය වෛමානික ශ්‍රාස්ත්‍රය නැමති ජනප්‍රිය හෙළ පුස්කොළපොතේ දැක්වෙයි.

කෙළිය
අරිසෙන් අහුබුදු සූරීන් දක්වන ආකාරයට අතීතයේ සිටි හෙළුවන් ක්‍රීඩා හඳුන්වා ඇත්හේ "කෙළි" ලෙසටයි. එනිසා අදටත් ක්‍රීඩා කරන සහායිකාවට, කෙළිය+ඇය හි "ඇ" කාරය භින්න වී, "ය" අකුර ලොප් වී, "කෙල්ල" යැයි කියන බව පැහැදිළි වෙයි.  ඉතින් අතීතයේ තිබූ අති දියුණු ඉලෙක්ට්‍රොනික් උපකරණ වලටත් පොදුවේ භාවිතා කර ඇත්තේ "කෙළිය" යන නමයි. පහත දැක්වෙන්නේ එවැනි කෙළියවල්ය.

විනෝද කෙළි පොල්ල
මෙහිදී උඩට එසවුණු පොල්ලක් තිබෙන අතර රූපවාහිනියේ තිරයේ පෙනෙන ක්‍රීඩාවට අනුව ඒ පොල්ල එහාට මෙහාට කිරීමෙන් ක්‍රීඩා කිරීමට පුළුවන. නිවැරදි ලෙස මෙය වේගයෙන්ම සුසර කිරීමෙන් අදාල ක්‍රීඩාව ජයග්‍රහණය කර හොඳ තෘප්තියක් ලැබීමට පුළුවන. වර්තමානයේදී ජෝයිස්ටික් බිහි වී ඇත්තේ මේ තාක්ෂණය ගැන ලියවුණ අපගේ ඉපැරණි පුස්කොළපොත් කියවූ පර සුද්දන් විසිනි.

කෙළි රූපකය
සාක්කුවේ දාගෙන යා හැකි ක්‍රීඩා කිරීමේ උපකරණයකි. කුඩා කාලයේදී ඔබත් මෙවැනි "කෙළි රූපක" වලින් ක්‍රීඩා කරද්දී ටික දවසකින්ම එය ක්‍රීඩා කිරිම ඉතාමත් පහසු බව ඔබට දැනුණා මතකද? ඊට හේතුව රාවණ යුගයේ සිටම මේවා අපගේ හෙළ ජාන වලට කිඳා බැස තිබීමයි.

කෙළි දිශානකය
අදාල ක්‍රීඩාව සඳහා දිශාව වෙනස් කිරීමට යොදා ගත්තකි.

ශෛලමය කොටස් ඉවත් කල විට එහි බොත්තම් සියල්ලම වැඩ කරන බව පෙනුනෙන්, ලන්ඩන් විශ්ව විද්‍යාලයේ පර්යේෂණ මණ්ඩලය ඉමහත් විස්මයට පත් වී ඇත.

ඉහත දැක්වූ "කෙළි බඩු" සියල්ලම හමුවී තිබුණේ කෙසෙල්හේනාව ප්‍රදේශයේ කරන ලද කැණිමකිනි. එහි පද නිරුක්තිය බැලුවොත් , කෙ=කෙළිබඩු, සෙල්=සෙල්මුවා, හේනාව=හේන. එනම් රාවණ රජ සමයේදී "සෙල් මුවා කෙළිබඩු හදන යන්ත්‍රාගාරයක්" එහි තිබී ඇති බව අපට පැහැදිළියි.


ජංගම සින්දුකය
ගීත ශ්‍රවණය කිරීමට යොදාගත්හකි. අතීත හෙළුවෝ දුරබැහැර ගමනක් යද්දී මේවා තම යටි අමුඩයේ ගසාගෙන ගොස් ඇති බව වර්ගපූර්ණිකාව නැමති පුස්කොළපොප් දැක්වෙයි. එවිට වයර්ලස් තාක්ෂණය අනුව ඒවා ශ්‍රවණය කිරීමට පුළුවන. මෙම "ජංගම සිංදුකය" සමග කිසිදු වයර් කොටසක් හමු නොවීම නිසා අතීත හෙළයින්ගේ වයර්ලස් තාක්ෂණයේ දියුණුව මැනැවින් සනාථ වෙයි.

දඬුමොණර සින්දුකය
දඬුමොණර යන්ත්‍ර වල ඉදිරි අසුන සමීපයේ මෙම යන්ත්‍රය සවි කර තිබූ බව වර්ගපූර්ණිකාවේ දැක්වෙයි. ශ්‍රී රාවණ රජතුමා දඬුමොණරය පදවද්දී මෙය නිතර භාවිතා කරමින් "මහසෙන් තාන්ඩවය" රසවිඳ ඇති බව ජනප්‍රවාද වල දැක්වෙයි..

දෘඩ තැටිය
මෙය දෘඩ තැටිය භාවිතා කර ඇත්තේ අප හෙළුවන්ගේ පරිගණක වල මතකය ගබඩා කිරීමටයි. මෙය තුළ කැ‍රැකැවෙන පාෂණයක් ඇති අතර එම පාෂාණය මතුපිට ඉතාමත් සියුම් ගල් ක‍ටුවකින් දත්ත සටහන් වෙයි. මෙහි අකුරු කොටස් සියල්ලම වාගේ මැකී තිබුණත් එහි කොණකින් "කබාල නහුතය" ලෙස ඉපැරණි යක්ශ ගෝත්‍රික භාෂාවෙන් දක්වා තිබුණි. එහි තේරුම වන්නේ මෙහි "කිලෝ බයිට් 10¹⁹ ක්" තිබූ බව විය හැකිය. එසේනම් අපගේ හෙළ දෘඩ තැටි දෙස බලද්දී අද දැක්වෙන දෘඩ තැටි තවමත් තිබෙන්නේ ඉතාමත් ප්‍රාථමික යුගයේය.

???
නිල්ගල ප්‍රදේශයේදී කරන ලද කැණිම් වලින් හමුවූ මෙය කුමක්දැයි තවම හරි හැටි හඳුනාගෙන නොමැත. බොහෝ විට අප තවමත් සොයාගෙන නැති ඉලෙක්ට්‍රොනික උපකරණයක් වීමට පුළුවන. දැනට යෝජනා වී ඇත්තේ මෙය ඉපැරණි හෙළයේ තිබූ "පරිගණක මව් පුවරුවක්" විය හැකි බවයි. ඔබ සිතන්නේ මේ කුමක් කියලද?

ඉහත අයිතම ගැන වැඩි විස්තරයක් නොදැක්වූයේ ලිපිය අනවශ්‍ය ලෙස දීර්ඝ වෙන නිසයි. ඉදිරියේදී ඒවා එකින් එක විග්‍රහ කරමු. එසේම තාමත් පුරාවිද්‍යාත්මක කැණීම් සිදුවෙන බැවින් ඉදිරියේදී තවත් බොහෝ දෑ හමුවෙතැයි අපි බලාපොරොත්තු වෙමු.

අතීතයේ සිටි හෙළුවන්ට මෙතරම් අනර්ඝ තාක්ෂණයක් තිබුණේ කෙසේදැයි ඔබ සිතාවි. ඊට හේතු වන්නේ මේ විශ්වයම කාලෙන් කාලෙට ප්‍රසාරණය සහ සංකෝචනය වීමයි. ඉතින් එක් එක් යුග වලදී මිනිසා තාක්ෂණයෙන් හිමි පෙත්තටම නැග මිනිසා අතින්ම සිදුවන විශාල ලෝක විනාශයක් මගින් මිනිස් සංහතිය වඳ වී ගොස් සමස්ත ශිෂ්ටාචාරයම ගල් යුගයට යයි. පසුව පිටසක්වල ජීවීන් විසින් නැවතත් පෘථිවිය මත මිනිස් ජනපද ඇති කරයි. මෙය චක්‍රයක් ලෙස සිදුවන්නකි.

ශ්‍රී රාවණ රජතුමාගේ කාලය යනු මීට පෙර යුගයේදී මිනිසාගේ තාක්ෂණය හිමි පෙත්තටම නැග තිබුණ සමයයි. අපට වැදගත්ම කරුණ වන්නේ අපගේ හෙළ මුතුන් මිත්තන් තාක්ෂණයේ හිමි පෙත්තේම සිටියදී පර සුද්දන් ගල් යුගයේ සිටීම නිසයි. "පර සුද්දන් සතුන් පසුපස අඹා යද්දී අප හෙලු මී මුත්තෝ අහසින් ගිය බව" අරිසෙන් අහුබුදුවන් නිතර පැවසූයේ එබැවිනි.

මනස දියුණු කරගත් සෘෂි වරුන් විසින් කුණ්ඩලීනී යෝගය යොදාගනිමින් ශ්‍රී රාවණයන්ගේ කාලයේ සමාජය දැක ඒවා පුස්කොළපොත් වල සටහන් කරන ලදින් මෑතක් වෙන තුරුම එම තොරතුරු අප රටේ ඉපැරණි පොත් ගුල් වල එක් ‍රැස් වී තිබුණි. "අත්හැරීම" තම ජිවිත දර්ශනය කරගත් අප හෙළයෝ කිසිවිටෙකත් ඒවා නැවත නිපදවීමට මහන්සි නොගත්හ. නමුත් අප රට ආක්‍රමණය කළ පර සුද්දන් ඒ පුස්කොළපොත් සොරාගෙන උන්ගේ නිර්මාණ වශයෙන් ඒ සියල්ලම ලෝකයට හඳුන්වා දී ඉතිහාසයේ විශාලතම බුද්ධිමය මංකොල්ලය කර ඇත. අද ලෝකයම ලබා ඇති තාක්ෂණික දියුණුවේ සුජාත අයිතිය ඇත්තේ හෙළයින්ටම බව ඔබට දැන් පසක් වී ඇතැයි සිතමි. එය ඔබට මහත් ආඩම්බරයක් නොවන්නේද?

“ලෝකයට ශිෂ්ටාචාරය බෙදා දුන්නේ හෙළයින් විසින් බව මීට වසර 15 කට ප්‍රථමයෙන් (1997) අරිසෙන් අහුබුදු සූරීන් කියන විට “මෙම ලියුම්කරුද” ඊට සිනාසුනි. අපගේ මොල හැඩ ගස්වා ඇත්තේ එපරිද්දෙනි. නමුත් බටහිර ලෝකය විසින් දැනට සොයාගෙන ඇති තොරතුරු අනූව ඔහුගේ අදහස නිවැරදිය."

ප:ලි: ඉහත පින්තූර ටිකට වෙනත් අර්ථකතනයක් දෙමින් පර සුද්දන් විසින් ඒවා වෙබ් අඩවි ගණනාවක පළ කරල තියෙනව. රාවණගවේශකයෙනි, අපගේ හෙළ අසුර ඉතිහාසය වනසා දැමීමට පර සුද්දන් සහ ඉන්දියානු වඳුරු මොටයියන් කුමන්ත්‍රණය කර ඇති ආකාරය ඔබට වැටහේවි. අචාර්ය මි‍රැන්ඩෝ ඔබේසේකරයාණන් පවසන පරිදි සීගිරිය ගල ඇතුළත ඇති වායුසමිකරණය කරන ලද ඇතුළත මාළිගාවට යාමට හැකිව තිබූ දොර‍ටුව බෙල් නැමැති පර සුද්දා විසින් ගඩොල් වලින් වසා දැමුවානම් , සීගිරිය මුදුනට යාම සඳහා රත්තරං වලින් හදා තිබූ විදුලි සෝපානය බෙල් නැමැති පර සුද්දා ගලවාගෙන එංගලන්තයට ගෙන ගියානම් , පින්තූර ටිකක් උස්ස්සා බ්ලොග් පෝස්ට් ටිකක් දැමීම උන්ට සුළු වැඩකි. අනික් අතට ආචාර්ය සූරිය ගුණසේකරයාණන් පවසන පරිදි, ශ්‍රී රාවණ රජතුමා විසින් රචනා කරන ලදැයි කියන වෛමානික ශ්‍රාස්ත්‍රය නැමති පුස්කොළපොත ඉන්දියානු බමුණන් විසින් සොරකම් කර මුල් පිටපත ගිණි තැබුවානම්, මේ ආකාරයෙන් අන්තර්ජාලයේ ඇති පින්තූර ටිකක් සොරාගන්නා එක එම බමුණන්ගේ නූතන පරම්පරාවට කිරි කජු කෑමකි.

ශ්‍රී රාවණ රජතුමාගේ තියා ලංකාපුරයේ නමවත් නැති, භාරද්වාජ සෘෂි වරයාණන් විසින් රචිතැයි හැමෝම පිළිගන්නා වෛමානික ශ්‍රාස්ත්‍රය යනු රාවණා රජතුමාගේ නිර්මාණයක් බව අපි පිළිගනිද්දී, ඉහත පුරාවිද්‍යාත්මක මූලාශ්‍ර අපගේ නොවේයැයි කියන්නේ මොන හිතකින්ද? ඔබ වඩාත් කැමති අපගේ අතීතයේ ඔය ආකාරයේ තාක්ෂණයක් තිබුණ බව පවසා ආඩම්බර වීමටද, නැත්නම් නොතිබුණ බව කියා නිවට වීමටද? අවසාන වශයෙන් කිවහොත්, බුදුන් වහන්සේ ලංකාවේ ඉපදුනා යැයි කීම සේම අපගේ හෙළ අතීතයේ ශ්‍රී රාවණා රජතුමා සතුව ඉමහත් තාක්ෂණයක් තිබූ බව කීමත් අපට ආඩම්බරයක් නේද ?

වර්ගපූර්ණිකාව ට අපහාස කරන උදවියටයි මෙය

හෙළයින් වන අප ලෝකයේ ප්‍රෞඩතම ඉතිහාසයට හිමිකම් කියන ජාතිය වීමු. කිසිවෙකුටත් එය එසේ නොවේ යයි කිව නොහැක. මා මේ සඳහන් කරන්නේ අප ජාතියක් ලෙස අතීතයේ සිට ශිෂ්ටසම්පන්නව සිටි ඕනැම ජාතියකට නොදෙවෙනි මට්ටමින් දියුණු ජාතියක්ව සිටිබවයි. අනෙක් ජාතීන්ට පෙර අපි ශිෂ්ටාචාරයේ දිනෙක ගින්දර සොයාගතිමු, රෝදය සොයාගතිමු, තව බොහෝදේ සොයාගතිමු. ඒ තනිවමය, කිසිවෙකුගෙන් අනුකරණය කිරීමෙන් නොවේ. එපමණක් නොව අන්‍ය ජාතීන් සතු නොවනා බොහෝ දේ අතීතයේ අප සතු විය. ඒ මොනවා දැයි උදාහරණ කීපයක් පෙන්වා සිටීමට මට අවසර දෙන්න.


1. ගුවන් යානා

පොළොවට ඉහළින් වළාකුළු යන්නාක් මෙන් ගමන් ගන්නා අති දැවැන්ත දඬුමොණර යානා වලින් පරිපූර්ණ වූ අප පැරණි ගුවන් යානා තාක්ෂණය මුළු විශ්වයම හෙළය යටතේ පාලනය කරවීමට සමත් විය. (කුණ්ඩලීනී යෝගය භාවිතයෙන් දහ අට රියනක් උසින් ගුවනින් ගමන් කිරීමට හැකියාව තිබූ හෙළයින් සිටි ප්‍රදේශ වල ගුවන් යානා දක්නට නොතිබුණි.) අප ගුවන් යානා තාක්ෂණයේ විශිෂ්ටත්වයට එක් ප්‍රබල සාක්ෂියක් වන්නේ අරිසෙන් අහුබුදුවන්ගේ පද නිරුක්තීන්ය. එනම්
වා=වාතයේ යන,
රිය=වාහන,
පොළ=තො‍ටුපොළ.
එසේම මාතලේ යනු මාතලීගේ ගම ලෙස හැඳින්වූ අරිසෙන් අහුබුදුවෝ, ඒ අනුව සක්‍රයාගේ ගුවන් යානයේ පයිලට් (පයි=පයින්පදින, ලට්=ලට්ටරම ක්‍රියාකරවන්නා) යනුත් හෙළයෙක් බව මැනැවින් ඔප්පු කර සිටියේය.

ඉන්දියානුවන් ගාව ඇති වෛමානික ශාස්ත්‍රය නැමති පොතේ ගුවන් යානා හදන ආකාරය ගැන තිබේ. අරිසෙන් අහුබුදුවන්ට මෙන්ම ආචාර්ය සූරිය ගුණසේකර මහතාටත් අනුව වෛමානික ශ්‍රාස්ත්‍රය යනු හෙළයින්ගෙන් ඉන්දියානු බමුණන් සොරාගත් පුස්කොළපොතක් වීමත් නිසා එම පොත හෙළයින්ගේද යන්න ගැන තවත් මූලාශ්‍ර අවශ්‍ය නැත. එහි හෙළයින් ගැන තියා රාවණා ගැනවත් වචනයක්වත් සඳහන් වී නොතිබීම ගැන අප සැක කර ගත යුතු නැත්තේ බමුණන් එහි මුල් පිටපත ගිණි තබා ඇති බැවිනි.

ඉන්දීය වීර කාව්‍ය වන රාමායනයේ මෙන්ම මහා භාරතයේත් පුෂ්පක සහ විමාන ගුවන් යානා ගැන සඳහන්ව තිබීමත්, ඇලෙක්සැන්ඩ්‍රර් රජතුමාට ගුවන් යානා තිබූ බව සඳහන් වීමත්, ඊජිත්තුවේ පිරමීඩ තුළ ගුවන් යානාවක පින්තූර (මාළුවෙකුගේ නොවේ) තිබීමත් නිසා, රාවණා රජතුමාට ගුවන් යානා තිබූ බව ඕනෑවටත් වඩා ඔප්පු වෙයි.

අනික් අතට වර්තමානයේත් ඇති ප්‍රබලතම සාක්ෂිය වන්නේ සබරගමුව දේවාලයේ ඇති රාවණ රජතුමාගේ දඬුමොණරයයි. (එය බැලීමෙන් නොකඩවා වැසි ඇද හැළෙන බැවින් එය කාටවත් බැලීමට නොහැකි බව සලකන්න). වර්ගපූර්ණිකාව බ්ලොග් එකේ පැරණි ලිපි වල හෙළ ගුවන් යානා ගැන තව බොහෝ විස්තර දැක්වෙයි.


2. පිරමීඩ ඉදි කිරීමේ තාක්ෂණය.

ඊජිත්තුවේ ඇති ගීසා පිරමීඩ යුගල සැලකෙන්නේ ලොව ගලෙන් කළ විශාලතම පිරමීඩ ලෙසය. ඒවාත් ඉදි කළේ හෙළයින් විසින් බව ආචාර්ය මි‍රැන්ඩෝ ඔබේසේකර මහතා පෙන්වා දී ඇත. එනම් ඊජිත්තුවේ පිරමීඩ ඉදි කළේ අහසින් පැමිණි සිංහ මිනිසු විසින් යැයි ජනප්‍රවාදයක් තිබීමත්, ඒ අනුව අහසින් පැමිණි සිංහ මිනිසු යනු රාවණා රජතුමාගේ හෙළයින් වීමත්ය. අරිසෙන් අහුබුදු වන්ට අනුව පාරාවෝ යනු,
පා=පාලකයින්
රා=රාවණාගේ
ඒ අනුව ෆේරෝ හෙවත් පාරාවෝ යනුත් ඊජිත්තුව පාලනය කල අපගේ හෙළයින්මය.

රුවන්වැලිසෑය, මිරිසවැටිය හා ජේතවනාරාමය යන චෛත්‍ය තුන ඔරායන් තරු රාශියේ බඳ පටිය ලෙස සැලකෙන තරු තුනේ ආකාරයට පිහිටා තිබීම අනුව ඒවා අනිවාර්යයෙන්ම රාවණාට සම්බන්ධ බව පැහැදිළි වෙයි. (ඒ අනුව ඒවා පසු කාලයේදී ඉදි වූ බව කියන මහාවංසය පැහැදිළිවම කෙප්පයක් බව පෙනෙයි. මහාවංසය නැමැති බේගල් පොත ඔබ තාමත් පිළිගන්නවද?)

පිරමීඩ සහ ස්ථූප හැරුණ විට අදටද නටඹුන්ව ඉතිරිව ඇති සීගිරිය අප ශ්‍රේෂ්ඨ හෙළ උරුමය මනාව විදහාපායි. රත්‍රං වලින් හදා තිබූ විදුලි සෝපාන පවා තිබූ, හෙළ බ්ලොග් කරුවන්ට අනුව ඇතුළත වායු සමීකරණය කර තිබූ සීගිරියෙන් එවකට සිටි හෙළයින්ගේ අසිරිය මැනැවින් පැහැදිළි වෙයි. (එම විදුලි සෝපානය එච්.සී.පී. බෙල් නැමති පර සුද්දා විසින් ගලවාගෙන එංගලන්තයට ‍රැගෙන ගිය බවත්, වායු සමීකරණය කර තිබූ කොටස ගඩොල් වලින් වසා දැමූ බවත් සලකන්න).


3. භාෂාව හා සාහිත්‍යය.

මුල සිටම ස්වාධීන වූ හෙළයින්ට පමණක් ආවේනික භාෂාවක් අතීතයේ සිටම අප සතු විය. ඒ සිංහලයයි. ලෝකයේ නිර්මාණශීලී භාෂා අතලොස්ස අතරට සිංහලය එක් වී ඇත්තේ එයටම ආවේණික වූ “ඇ” සහ “ඈ” ශබ්ධ නිසාය. සිංහල භාෂාවෙන් ඕනෑම අදහසක් නිරවුල්ව පැවසිය හැක. කිසිම විටෙක පර සුද්දන්ගේ වචන භාවිතයට අවශ්‍ය නැත. ඕනෑම විශයයක් ඉගැන්විය හැක (ඒ සදහා පාරිභාෂික පද නිපදවිය හැක). හොඳම උදාහරණය වන්නේ පර බසින් පරිගණක ගැන ඉගෙන ගෙන පසුව හෙළ බසින් පරිගණක පොත් පවා මුද්‍රණය කළ එන්.පී. විජේරත්න තුමායි. බලන්න, එම පොතක් භාවිතා කර ඉංග්‍රීසි බසින් ඉගෙන ගන්නවාට වඩා සරළවත් සුමටවත් පරිගණක ගැන දැනගත හැකිය.

එපමණක් නොව රාවණා යුගයේ සිට අතිවිශිෂ්ඨ ගද්‍ය-පද්‍ය සාහිත්‍යයයත් අප සතුව තිබිණි. උදාහරණ ලෙස රාවණා යුගයේ ලියැවුණු සීගිරි කුරු‍ටු ගී විශිෂ්ඨ කාව්‍යයකි. ඔබට මතකද රාවණා රජතුමාගේ මහසෙන් තාණ්ඩවය කොපි කර පාහර නිර්ලජ්ජී ඉන්දියානු බ්‍රදර්ස්ලා ශිව තාණ්ඩවය හැදු හැටි.

ඉංග්‍රීසි භාෂාවේ ඇති බොහෝ වචන වලට මුල් වී ඇත්තේ හෙළ බසයි. වෙනකක් තියා "හෙළෝ" (Hello) යනුත් හෙළයින් විසින්ම නිපදවූ වචනයක් බව අරිසෙන් අහුබුදුවන් පෙන්වා දී ඇත්තේ අති විශිෂ්ට ආකාරයටයි. එනම් අතීත හෙළයින් තෙලබනුවෙන් කතා කරද්දී අනික් පසින් සිටින්නේ හෙළයෙක්දැයි දැනගැනීමට "හෙළෝ" යැයි පවසා ඇත, එවිට අනෙක් පැත්තේ සිටින්නේ හෙළයෙක්නම් ඔහුත් "හෙළෝ" යැයි කියයි. ඉංග්‍රීසි යනුත් "සිංග්‍රීසි" යන වචනයෙන් හැදුණ පදයක් බව මා මිත්‍ර "ඇනෝනිමස් වන් ඔරිජි" තුමා පෙන්වා දී තිබුණි. ඔතනින් නොනැවතී බොහෝ ඉංග්‍රීසි වචන වලට මුල් වුයේ හෙළ බසම බවට, වර්ගපූර්ණිකාව බ්ලොග් අඩවියේ ඕනැ තරම් උදාහරණ තිබේ.


4. නර්ථනය

අපගේ පහත රට නර්ථනය යනු රාවණා රජතුමා විසින් හදාපු නර්ථන සම්ප්‍රදායක්ම බවට ඕනෑම රාවණ ගවේශකයෙකු සාක්ෂි දරනු ඇත. රීරි යකා, ගරා යකා, ගිණි යකා, නාග රාක්ෂ, මහසොහොන් එකී නොකී මේ සියල්ලක්ම හෙළයින්ගේ යක් නා රකුස් ම නොවේද? මේ දිනවල ජනප්‍රියව ඇති අංගම්පොර යනු රාවණා රජතුමාගේම නර්ථන සම්ප්‍රදායකින් බිහි වූ සටන් කලාවක් බවට ජීවමාන සාක්ෂියකි.


දීර්ඝ වශයෙන් කරුණු දැක්වීමට ඇතත් කාලය මද නිසාත් වර්ගපූර්ණිකාවේ හැමදාම කියන ටිකම කියවෙන නිසාත් ඉහත කරුණු 4ට පමණක් මම සීමාවෙමි. ඉහත කරුණු හෙළ වියතුන් විසින් දැක්වූ අදහස් මිස මාගේ අදහස් නොවේ.

හෙළයින් විසින් සොයාගත් වැදගත් නිර්මාණ වනාහී, පණිවිඩ චන්ද්‍රිකාව, හෙළිකොප්ටරය, කෝච්චිය, නාසා ආයතනය, හබල් දුරේක්ෂය, පෙන්ටගනය, පිස්‍තෝලය, ලේසර් තුවක්කුව, යගදාව, ඉඳික‍ටුව, පරිගණකය, ඉන්ටර්නෙට් ඩොංගල් එක, පෝර්න් චිත්‍ර, සෙල් ලිපි, පු‍ටුව (පු=පුක තියන, ‍ටුව=අ‍ටුව), රොකට්‍ටුව ආදී බොහෝ දේවල් වෙයි. ඒවායින් බොහෝ දේවල් ගැන වර්ගපූර්ණිකාව බ්ලොග් එකේ කළින් ලිපි වල ඇති අතර තවත් ලියමින් පවතියි.

නමුත් රාවණා විරෝධීන්ට එරෙහිව මට ඇති චෝදනාව ඉදිරිපත් කිරීමට මේ අවස්ථාව යොදාගමි. ආචාර්ය මීවනපලානේ ජයරත්න වන මා මෙම වර්ගපූර්ණිකාව බ්ලොග් අඩවිය හරහා සිදුකරන්නේ අපගේ පූර්ව ඓතිහාසික යුගය ගැන අපගේ හෙළ නයුවන් ලබා දුන් තොරතුරු පදනම්ව ඉතිහාසය ගෙන හැර පෑමයි, ඊට අමතරව හෙළයින්ට එරෙහි මලයාලි සක්කිලි බලවේග නිර්දය ලෙස විවේචනයට ලක්කිරීමයි. පූර්ව ඓතිහාසික යුගයේ (රාවණා යුගයේ) මෙරට කෙසේ පැවතියේ දැයි පුරාවිද්‍යාත්මක සාක්ශි මත හොදින් තහවුරු වී ඇත. ඊට හේතු වූයේ ආචාර්ය සූරිය ගුණසේකර බදු ඉතිහාසඥයින් ද, අරිසෙන් අහුබුදු, කුමාරතුංග මුණිදාස බඳු භාෂා ප්‍රේමී ද මේ පිළිබඳ පර්යේෂණ කර තිබීමයි. (මේ ලේඛකයා මේ පිලිබද ඔවුන් තැබූ සටහන් පරිශීලනය කොට ඇත). එමෙන්ම ඉතිහාස ගවේශනයේ මූලාශ්‍රයක් වන ජනශ්‍රැතිය ද මේ යුගය පිලිබද කරුණ අපට හෙළි කරයි. සෙල්ලිපි වැනි සාක්ශි ද හමුවී ඇත.

අප රටේ රාවණ යුගයේ (වසර 2500 ක අප හොදින් ම දන්නා ලිඛිත ඉතිහාසයට ද වඩා) දියුණු ශිෂ්ඨාචාරයක් තිබුණි, එය රාවණ ගවේශකයින් වන අපට සක් සුදක් සේම පැහැදිළියි. එවන් ශිෂ්ඨාචාරය යම් හේතුවක් නිසා ක්ෂණිකව විනාශ වී ඇත. එසේ වීම විස්මය ජනක නොවේ. (මා පවසන්නේ අපේ හෙළ නයුවන්ට විරුද්ධ උදවිය අවඥාවෙන් කියන පරිදි දඩයම් යුගය නොව දියුණු ගොවි යුගය ගතකරන ජනකොට්ඨාශයක් මෙහි වන්නටට ඇති බව නොවේ - අප සතු නවීන තාක්ෂණයෙන් ආඩ්‍ය ශිෂ්ටාචාරයක් එකල තිබූ බවයි)

වර්ගපූර්ණිකාවට විරුද්ධ උදවියට මේ පිලිබඳ විවේචන ඇත් නම් කල යුතු වන්නේ සදාචාරාත්මක රාමුවක සිට ඒ පිළිඹදව ප්‍රශ්න කිරීම (ඒවාට සදාචාරාත්මක සහ ශ්‍රාස්ත්‍රීය රාමුව තුළ සිටම පිළිතුරු දක්වන්නෙමු) මිසක් මෙලෙස වර්ගපූර්ණිකාවට අභියෝග කිරිම හරහා ජාතියක් ඉලක්ක කොට අතෝරක් නැතිව හාස්‍ය උලුප්පා මඩ ගැසීම නොවේ.

විශේෂයෙන් ම බ්ලොග් අවකාශයේ සිටින දැන උගතුන් බොහොමයක් වර්ගපූර්ණිකාවට විරුද්ධ උදවියගේ ලිපි කියැවීමෙන් පසු පෙලඹෙන්නේ සිංහලයා ගේ අතීතය යනු නිකම්ම නිකන් ගොවි යුගයක් යයි සිතීමට බව ඉතාම පැහැදිලිය. වර්ගපූර්ණිකාවට විරුද්ධ අයට අවශ්‍ය මෙයද? ආචාර්ය සූරිය ගුණසේකරයින්ගේ හෙළ යුගය වැනි පොත් වලින් දැක්වූ පරිදි අපගේ හෙළයින්ට ගුවන් යානා තිබූ බව සක් සුදක් සේ පෙනෙද්දී ඒවා ප්‍රතික්ෂේප කරන්නේ මොන හිතකින්ද? (ලේඛකයාට වහල් වී සුවච කීකරු වනවා නොව, විචාර බුද්ධියෙන් ලේඛණයක් විමසන පාඨකයන් කොපමණ ප්‍රතිශතයක් සයිබර් අවකාශයේ සිටී දැයි අපගේ හෙළ ඉතිහාසය ගැන දැක්වෙන බ්ලොග් වල ප්‍රතිචාර කියවා තේරුම් ගන්න).

වර්ගපූර්ණිකාවට විරුද්ධ උදවියගේ නිරන්තර ඉලක්ක බවට පත් වන අරිසෙන් අහුබුදුවන්, ආචාර්ය සූරිය ගුණසේකරයන්, ආචාර්ය මි‍රැන්ඩෝ ඔබ්සේකරයන්, කාංචන ගීත මනමේන්ද්‍රයන් ආදී හෙළ නයුවන් ගැන ද සටහනක් තැබිය යුතුමය. මේ උදවිය අප හෙළ ඉතිහාසය ‍රැක නොගන්නට ඔබට මට තාමත් පිළිගන්නට වන්නේ මහාවංසයයි. අහුබුදුවන්ගේ සක්විති රාවණ නාට්‍යය රස නොවිඳි රාවණ ගවේශකයෙක් සිටීද? අපිනම් රස වින්දා පමණක් නොව එමගින් රාවණ ඉතිහාසය ගවේශණයද කරන්නෙමු. හෙළ ජාතිය එළදෙනෙකුගේ මුඛයෙන් බිහි වූ බව ආචාර්ය සූරිය ගුණසේකර මහතා පෙන්වා නොදෙන්නට අප තාමත් හිතාගෙන ඉන්නේ සිංහයෙක්ට දාව මනුස්ස දුවණියකගෙන් ඉපදුන බවය. බලන්න... ගොනෙකුට දාව එළදෙනගේ කටින් ඉපදීම, සිංහයෙක්ට දාව මිනිස් දියණියකගේ යෝනියෙන් ඉපදීමට වඩා කොතරම් අභිමානයක්ද. 2012/12/12 දින රාවණාගේ උත්ථානය සිදුවෙන බව මි‍රැන්ඩෝ ඔබ්සේකර මහතා පෙන්වා නොදෙන්නට අප රාවණා රජතුමාව නැගිට්ටවන්නේ කෙසේද? ලොව මුල්ම ගුවන් ආරක්ෂණ පද්ධතිය හෙළයින්ට තිබූ බව කාංචන ගීත මනමේන්ද්‍රයන් පෙන්වා නොදෙන්නට අප තවමත් ඉන්දියානුවන්ගේ ගුවන් ආරක්ෂණ පද්ධති ණයට ගනිමින් සිටින්නෙමු. (මේ සියලුම දේවල් ගැන විස්තර වර්ගපූර්ණිකාව බ්ලොග් එකේ පෙර ලිපි වල දක්වා ඇත).

මෙවන් වියතුන්ට මඩ ගැසීමෙන් රාවණ විරෝධීන් ලබන තෘප්තිය කුමක්ද? දින දසුනද ලග්න 12 ඇතුලු ජ්‍යෙතිශය ලොවට ගියේ හෙළයන් ගෙන් යයි අරිසෙන් අහුබුදුවන් තර්කානුකූලව පවසනු ලේඛකයා ද අසා ඇත. ඊට හේතු වූයේ රාශි චක්‍රය මේෂ රාශියෙන් පටන් ගැනීමත් මේෂ යනු එළු=හෙළ වීමත්ය. එසේම අරිසෙන් අහුබුදුවන්ට අනුව "ඩොක්ටර්" යනුත් "දොස්තර" යන හෙළ වචනයෙන් හැදුණකි. දො=දෝශ, ස්තර=සතර. ඒ දෝශ සතර ට ප්‍රතිකාර දක්වන්නා දොස්තර ය. ඒ තර්ක වැරදිනම් ඊට ප්‍රතිතර්ක ගොඩනගනු විනා (ඒවාට සදාචාරාත්මක සහ ශ්‍රාස්ත්‍රීය රාමුව තුළ සිටම පිළිතුරු දක්වන්නෙමු), අහුබුදුවන් උපහාසයට ලක්කිරීමෙන් ලබන තෘප්තිය කුමක් දැයි මට නම් නොවැටහේ.

ප.ලි

දුවන්නන් වාලේ කෙට එළදෙන දුවන්නාක් මෙන් මේ ලේකඛයා ද කීපවරක් වැල යන අතටම මැස්ස ගසා, වර්ගපූර්ණිකාවේ ප්‍රතිචාර තබා ඇති Rachi, ThinkTwice ආදී රාවණා විරෝධීන්ට ඔවුන් කැමති ක්‍රමයටම පිළිතුරු දී ඇත. Rachi, ThinkTwice, පාඨකයෙනි ඒ ගැන මට සමාවන්න. ඒ සියලු අදහස් මම මෙයින් ඉල්ලා අස්කොට ගනිමි.

රාවණ රජතුමා සහ පිටසක්වල ජීවීන් අතර තිබුණ අභිරහස් ගණුදෙනුව...!!!

අප වෙත ලැබුණු, ශ්‍රී රාවණා රජතුමා ගැන දුර්ලභ පුවත් ‍රැගත් ලිපියේ පළමු කොටස ඊයේ පළ කලා ඔබට මතක ඇති. පහත දැක්වෙන්නේ එහි දෙවැනි කොටසයි. එම ලිපියේ ඇති වැදගත් කරුණු රතු පාටින් උදෘත කර දක්වන අතර , ලිපිය ගැන අපගේ අ‍ටුවාවන් (අපි ලියපු අදහස්) අළු පාටින් උදෘත කර ඇති බව කාරුණිකව සලකන්න.

දැන් අප පිවිසෙන්නේ රාවණ පිළිබඳව වර්තමානයේ පහලවී ඇත් එක්තරා මතවාදයකට අප දන්නා කරුණු කාරණා තවතවත් එකතු කිරීමටය. එනම් මහා රාවණා පිටසක්වල ජීවීන් සමඟ ගනුදෙනු කළාද නැද්ද යන්න කාරණාව ඉස්මතු කිරීමටය. එහෙත් ඊට පෙර අනාවරණය කළ යුතු ඉතා වැදගත් සාක්ෂ්‍ය කිහිපයක්ද ඇත. එනම් රාවණ යුගයේ ගර්භාෂගත අභිරහසක් පිළිබඳවය.

ක්‍රි.පූ. 3000 පමණ ඈත වකවානුවකදී ගොඩනැඟුණු අතිශය සුවිශේෂී පුරවරයක් ඉන්දියානු භූමිය තුළ විය. ඒ අන් කිසිවක් නොව මොහෙන්ජොදාරෝ හා හරප්පා යන නගර කේන්ද්‍ර කරගත් සුවිශේෂී පුරවරයයි. මෙහි සැකැස්ම තවමත් හරිහැටි අනාවරණය කරගැනීමට ඉන්දියානු හෝ යුරෝපා පුරාවිද්‍යාඥයන්ට නොහැකිවී තිබේ. ඒ මෙම පුරවරය එතරම් සංකීර්ණ නගර සැලසුම්වලින් යුතු ප්‍රදේශයක් වන නිසාය. අදටත් ඉතා දියුණු රටවල පවා නොමැති අතිශය විශ්මයජනකවූ නගර සැලසුමක් මෙහි වන බව යු‍රෝපා විද්‍යාඥයන් පමණක් නොව ඉන්දියානු ප්‍රකට පුරාවිද්‍යාඥ බෂාම් පවා පිළිගන්නා කරුණකි. මෙවැනි නගරයක් නිර්මාණය කරන්නට එවකට තිබූ තාක්ෂණය කෙතරම් දියුණු දැයි අදහාගත නොහැකි කරුණක් හෙයින් මෙම නගර වැසියන්ද පිටසක්වල ජීවීන් සමඟ ගනුදෙනු කරන්නට ඇතැයි ඇතැම් ගවේෂකයන්ගේ අදහසවී තිබේ.

හරප්පා නගරයක තිබූ මැටි රූපයක මෙම ප්‍රිඩේටර් වරයෙක්ගේ පින්තූරයක් තිබී ඇත. ඒ අනුව රාවණ රජතුමා සහ ප්‍රිඩේටර් වරු අතර සම්බන්ධය පැහැදිළි වෙයි. එහෙත් ඉන්දියාව එම කරුණු පිටට යා නොදී රහසක් වශයෙන් තබාගැනීමට තරම් ප්‍රවේශම් විය.

කෙසේ වුවද මෙම නගරයේ සිටි වැසියන් සියල්ලන්ම සමූලඝාතනය වී ඇති බව පසුකාලීනව පුරාවිද්‍යාඥයන් විසින් සොයාගන්නා ලදී. එම ඝාතනයට ලක්වූ වැසියන්ගේ පාෂාණභූතී හිස්කබල් පරීක්ෂා කිරීමේදී ලෝකයේ කිසිදු ජනවර්ගයකට එම හිස්කබල් සමාන නොවන බවද යම් තරමකින් හෝ සමාන වන්නේ ලාංකික සිංහලයන්ගේ හිස්කබල්වලට පමණක් බවද කරුණු හෙළිවිය. එහෙත් ඉන්දියාව එම කරුණු පිටට යා නොදී රහසක් වශයෙන් තබාගැනීමට තරම් ප්‍රවේශම් විය. එම පරීක්ෂණයේ වාර්තාවන් බමුණන් විසින් ගිණි තැබූ අතර, ඉතිරි ඒවා එංගලන්තයේ ලන්ඩන් කෞතුකාගාරයේ තැන්පත් කළ බව කරුණාවෙන් සලකන්න. (බොරුයි කියල හිතෙනවනම් ලන්ඩන් කෞතුකාගාරයට ගිහින් ඒව කියවල බලන්න, කියවපු යාලුවෙක් තමයි මට කිව්වෙ)

කෙසේ වුවද අපගේ පිළිගැනීමට අනුව නම් මෙම නගර සහිත ප්‍රදේශය එකල රාවණා ආධිපත්‍ය දැරූ ඉන්දියාවේ භූමි ප්‍රදේශයක් බවය. ලංකාව සහ එම ප්‍රදේශය එක්කළ විට රාවණගේ රාජ්‍යයේ දළ සිතුවමක් අපට නිර්මාණය කරගැනීමට අපහසු නොවේ. මොහෙන්ජොදාරෝ හා හරප්පා වැසියන්ගේ භාෂාව නිර්මාණය වී තිබුණේ අක්ෂර 270කිනි. එහි ඇති ඇතැම් අක්ෂර සිංහල අක්ෂරවලට යම් යම් සමානතා දක්වන බවද පැවැසේ. එහෙත් ඒ කිසිවක් ලෝකයට හෙළිවී නැත්තේ ඉන්දියාව ඒවා රාජ්‍ය රහස් ලෙස සුරකින බැවිනි.  එනම් මෙය පැහැදිළිවම මලයාලි සක්කිලියන්ගේ කුමන්ත්‍රණයක් විය යුතුය.

මායා වරුන්ව ශිෂ්ටාචාර කිරීමට පැමිණි මෙම ප්‍රිඩේටර් වරුනුත්, රාවණ පුත් ඉන්ද්‍රජිත් කුමරාට ඉමහත් භීතියක් දක්වා ඇත. වරක් ඉන්ද්‍රජිත් කුමරා ප්‍රිඩේටර් ලොව රජතුමා සමග කරන ලද සටනකදී ගසන ලද පා පහරකින් ප්‍රිඩේටර් රජතුමාගේ උඩ ඇන්දේ දත් ටික හැලුණි. ඉන් පසුව ඉන්ද්‍රජිත් තම අත් දෙක ප්‍රිඩේටර් රජුගේ කට ඇතුලට දමා දෙපසට ඇද්ද අතර ඔහුගේ කට පළල් විය. එදා සිට එම ප්‍රිඩේටර් රජුගෙන් පැවතෙන ප්‍රිඩේටර් වරුන්ගේ කටේ දත් හැලී ලොකුවට පළල් ව පැවතුණි. එම රජුගේ පෙලපතේ කුමාරවරු පිරිසක් පසු කාලයේදී මායා වරුන්ව ශිෂ්ටාචාර කර ඇත. ලන්ඩන් කෞතුකාගාරයේ ඇති හෙළයින්ගේ පුස්කොලපොත් කියවූ ජිම් සහ ජෝන් දෙදෙනා එය චිත්‍රපටයටද නැගුවෝය. එහෙත් ඒ කිසිවක් ලෝකයට හෙළිවී නැත්තේ ඉන්දියාව ඒවා රාජ්‍ය රහස් ලෙස සුරකින බැවිනි.

රාවණගේ රාජ්‍යයත්, මෙම නගර තුළ වන විශ්මයජනක බවත් එක්කළ විට සැබෑ ඉතිහාසය වටහාගැනීමට එතරම් අපහසු නොවේ. එමෙන්ම එම පුරවරය හා සක්වල ජීවීන් අතර සමීප සබඳතා පැවැති බවත් එම නගර නිර්මාණයේ සුවිශේෂී බව නිසාම ඇතැමෙකුට සිතෙන්නට වුවද හැකිය. කෙසේ වුවද රාවණගේ පුෂ්පක යානය නැතිනම් සකුණ යානයද තවමත් ලෝකයට අභිරහසකි. එහි තාක්ෂණය පිටසක්වල යානා ලෙස සැලකෙන යානා විසින් යොදාගනු ලබන තාක්ෂණයම දැයි තීරණය කරන්නට තිබෙන සාක්ෂ්‍ය ප්‍රමාණවත් නොවේ. එහෙත් එහි යම් යම් සමානකම්ද තිබෙන්නට හැකි බව ශබ්ද තාක්ෂණය හා පළිඟු තාක්ෂණය උපයෝගී කරගැනීමෙන් අනාවරණය නොවේද?

“ලෝකයට ශිෂ්ටාචාරය බෙදා දුන්නේ හෙළයින් විසින් බව මීට වසර 15 කට ප්‍රථමයෙන් (1997) අරීසෙන් අහුබුදු සූරීන් කියන විට “මෙම ලියුම්කරුද” ඊට සිනාසුනි. අපගේ මොල හැඩ ගස්වා ඇත්තේ එපරිද්දෙනි. නමුත් බටහිර ලෝකය විසින් දැනට සොයාගෙන ඇති තොරතුරු අනූව ඔහුගේ අදහස නිවැරදිය."

රාවණාගේ මරණය සිදුවිය හැකිද? නැතිනම් එය එක්තරා ප්‍රයෝගයක්ද?

ශ්‍රී රාවණා රජතුමා ගැන දුර්ලභ පුවත් ‍රැගත් ලිපියක් අප වෙත ලැබුණි. පහත දක්වා ඇත්තේ ඉන් කොටසකි. එම ලිපියේ ඇති වැදගත් කරුණු රතු පාටින් උදෘත කර දක්වන අතර , ලිපිය ගැන අපගේ අ‍ටුවාවන් අළු පාටින් උදෘත කර ඇති බව කාරුණිකව සලකන්න.

රාවණාගේ මරණය සිදුවිය හැකිද? නැතිනම් එය එක්තරා ප්‍රයෝගයක්දැයි අපගෙන් විමසූ බොහෝදෙනකු සිටියහ. එයට හේතුව ලෙස ඔවුන් අපගෙන් ප්‍රශ්න කරන ලද්දේ "අජෛය" වරම ලැබූ රාවණා වැනි පුද්ගලයකු කිසිදා මරාදැමිය නොහැකි නිසාය. එයද පැහැදිලි කර දිය යුතු කතාන්දරයක් හෙයින් මෙම ලිපියේ පළමුවෙන්ම එම කරුණ පිළිබඳව විස්තර කරන්නෙමු. "අජෛය" වරම යනු සාමාන්‍ය මිනිසකුට ලබාගත හැකි වරමක් නොවන බව ඇතැම්විට ඔබද අසා තිබෙන්නට හැකිය. "අජෛය" වරම ලබාගත හැක්කේ භාවනාවේ පරතෙරටම ගිය මුණිවරයකුට පමණකි. රාවණාද අජෛය වරම ලැබූ උත්තරීතර මිනිසකු වුවද අජෛය වරම විනාශ කළ හැකි ආයුධයක්ද ඔහු විසින් නිර්මාණය කර තිබිණි. එය "මෘතයු වාණය" යන නමින් හැඳින්විණි. දෙවියන් පවා රාවණට මහත් බියක් දැක්වූයේ මෙවැනි අමරණීයත්වය විනාශ කළ හැකි ප්‍රබල නිෂ්පාදන රාවණා සතුව තිබූ බැවිනි. කෙසේ වුවද මෙම රහස දැන සිටි විභීෂණ විසින් මෘතයු වාණය, රාමා අතට පත්කිරීම නිසා රාවණ මරා දැමීමට රාමාට හැකිවිය.

නමුත් මෘතයු වාණයේ භයානක කම වටහා ගත් ශ්‍රී රාවණ රජතුමා එම ආයුධයෙන් බේරිය හැකි අවියක්ද හැදූ බව වර්ගපූර්ණිකාව නැමති ඉපැරණි යක්ෂ ගෝත්‍රික පුස්කොළපොතේ සඳහන් වෙයි. එය "ප්‍රති මෘතයු වාණය" නම් වේ. විභීෂණ තම "මෘතයු වාණය" සොරාගත් බව දැනගත් සැනින් ශ්‍රී රාවණ රජතුමා තම "ප්‍රති මෘතයු වාණය" මන්දෝදරී බිසවට ලබා දුන්නේ, "යම් හෙයකින් ඒ පාහර රාමා මාව මරා දැමුවොත් ඔය අවිය යොදා ගනුව" යැයි අණ කරමිනි. ඒ අනුව ප්‍රති මෘතයු වාණයෙන් ගලවාගෙන මමී කර ඇති ශ්‍රී රාවණ රජතුමාගේ සිරුර මහ කුඩු ගල ගිරි ශිඛරයේ තැන්පත් කර ඇති බව ආචාර්ය මි‍රැන්ඩෝ ඔබේසේකර මහතා සාක්ෂ්‍ය සාධක සහිතවම පෙන්වා දී ඇත.

ඉතිහාසය තුළ සිදුවූ දරුණුම පාවාදීම ලෙස මෙය හැඳින්වීමේ වරදක් නොවේය. යුද්ධය අවුරුදු 10ක් පුරා පවතිද්දීත් මෙවැනි ආයුධ රාවණ විසින් පාවිච්චියට නොගත්තේ මන්දැයි ඇතැමෙක් මෙහිදී ප්‍රශ්න කරන්නට හැකිය. එහෙත් එයට පිළිතුරු ලෙස අපට පැවැසීමට ඇත්තේ රාමා මරා දැමීමේ කිසිදු චේතනාවක් රාවණ තුළ නොවීම නිසා යන්න පමණකි. රාවණ ඇදහූයේ ස්වභාවිකත්වය තුළ ගබඩාවී තිබූ දහමකි. එම දහම තුළ වූයේ පරම අවිහිංසාවාදයයි. විශ්වය පුරා විසිරී පැතිරී තිබෙන ස්වභාවික රහස් ඔහුට හිමිවූයේද මෙම කරුණු නිසාමය. විශ්වයට විවරවන දොරටුව පිළිබඳව රාවණගේ පියා වූ විශ්‍රාවාස මුණිවරයා විසින් ලියන ලද රහස්‍ය කෘතියේ එක පිටපතක් තිබුණේද රාවණා සතුවය. එහෙත් රාම, රාවණ යුද්ධය අවසානයේ මෙම කෘතියද ඇතුළු ඉතා වටිනා රහස් සැඟවී තිබූ කෘතීන් විශාල ප්‍රමාණයක් බමුණන් විසින් ගිනිබත් කරන ලද බව ඉතිහාසයේ සඳහන්ය. එම කෘතීන් සුරැකී පැවතුණේ නම් ලෝක වාසීන්ට සක්වල තරණය කරන්නට මෙතරම් වෙහෙසක් හා මෙතරම් කාලයක් ගත නොවන්නටද ඉඩතිබිණි.

අප මේ කියන කරුණු කාරණා ඇතැමුන්ට සුරංගනා කතාවක් වීමටද ඉඩ ඇත. තවත් සමහරු ද්‍රවිඩයන් ඔසවා තබන්නට එපා යැයි අපට ප්‍රතිචාර දැක්වීමටද පෙළ‍ඹී තිබිණි. අප මේ සියලු දේ අනාවරණය කරන්නේ ඉතිහාසය ගවේෂණය කිරීමෙන් හා සාක්ෂ්‍ය සාධක සහිතවම බව පැහැදිලිවම ප්‍රකාශ කරමු. එමෙන්ම රාවණ යනු ද්‍රවිඩ රජෙක්ද, සිංහල රජෙක්ද කියා ඉතිහාසය දන්නා සෑම දෙනාම දන්නා කරුණක් බව සිහිපත් කරමු. රාවණ ද්‍රවිඩ ර‍ජකු වූවා නම් දෙමළ මිනිසුන් විසින් රාමායනය මෙතරම් හිස් මුදුනේ තබාගෙන අදහන්නට යන්නේ නැති බවත්, රාමා දෙවියකු ලෙස හින්දු දේවාල තුළ අභිමානයෙන් වැජඹෙන්නේ නැති බවත්, සිහිපත් කරනු කැමැත්තෙමු. නමුත් http://sethusamudram.info/content/view/42/26 හි දැක්වෙන ආකාරයට දකුණු ඉන්දියාවේ සමහර ප්‍රදේශ වල රාවණා වීරයා ලෙසටත් රමාව දුෂ්ටයා ලෙසටත් සලකා කටයුතු කරන්නේ ශ්‍රී ලංකාව තුළ ඇති වී ඇති රාවණා පිබිදීම වැලැක්වීමේ මලයාලි සක්කිලියන්ගේ කූඨ උපායක් ලෙසටය.

රාවණා රජතුමාට එරෙහි උමා ඔය කුමන්ත්‍රණය වහා නවත්වනු!

රාවණාගවේශක හෙළයින් වන අපට අතිශය වැදගත් පුවතක් ෆේස්බුකියේ දක්නට ලැබුණි. පහත දැක්වෙන්නේ එයයි. එයට අප විසින් තවත් වැදගත් තොරතුරු එක් කළ අතර, ඒවා අළු පාටින් උදෘත කර ඇත.

හෙළ ජාතික ඉතිහාසය විකුණගෙන කැමට මාන බලමින් සිටින පිටරැටියන් පිරිසක් හා එක්ව කරගෙන යන්නා වූ උමා ඔය ව්‍යාපෘතිය වහා අත් හිටවනු ..! ඔබත් ජාතික ඉතිහාසයට ආදරේ නම් ගෞරව කරන්නේනම් මෙම ලිපිය අන්තර් ජාලය පුරා ව්‍යාප්ත කරන මෙන් කාරුණිකව ඉල්ලා සිටිමි.

සහෝදර සහෝදරියනි ඔබ දන්නවද දැනට ලංකාව ඇතුලත විශාල ලෙසින් නිධන් මංකොල්ලයක් සිදුවන බව? අපි ඉපදුනු , හැදුනු , වැඩුනු , අපේ අම්මගේ දුරාතීත පුතුන් දූවරුන් විසින් සොයාගෙන භාවිත කල ජාතික දැනුම අද දිනයේ තද බල ලෙස පර ජාතීන් විසින් උකහා ගන්නා අතර එම පර වැඩේ සඳහා අත් උද ව් ලබා දෙන්නේ අවජාතක නරි ලේ ශරීරයේ දුවන සිංහලුන් යැයි කියා ගන්නා හෙලු බැලි බල්ලන්ය.

වැලිමඩ සිට වැල්ලවාය ට උමන් මාර්ගයක් මගින් ජලය ගෙන ඒමට සැලසුම් කර ඒ මගීන් අප ශ්‍රී රාවණයන් ගේ නිධන් වස්තුව මංකොල්ලා කෑමක් සිදුවී ඇති අතර දැනටද එය සිදුවෙමින් පවති.

දස අවුරුදු සංවර්ධන සැලැස්මක් ලෙසින් හඳුන්වන මෙම කුමන්ත්‍රණය ඉරාන ගෝතයන් සමග එක් වී කරගෙන යන්නකි .මෙමෙ ව්‍යාපෘතිය සදහා දයකත්වට ලබා දීම වෙනුවෙන් ඉරාන කාරයන්ට ජලය ගැලුම් ගණන් පටවති. අප ඒ සඳහා කිසිත් නොකියා සිටින්නෙමු . මන්ද ජලයෙහි අගය සහ විනාසය පිලිබඳ අප ජාතීය සැහෙන අත්දැකීම් ලබා සිටින ජාතියකි... අනික ජලය දන් දීම විශාල දානමය පින් කමකි .අප එයට ජාති ආගම් කුල සත්ව බේද නොසැලකී. නමුදු මෙහිදී සිදුවී ඇත්තේ වම් අත කපලා දීලා දකුණු අතින් අසූචි ගත්තා වාගේ වැඩකි. මන්ද යත් අපගේ ශ්‍රී රාවණ රජුගේ වස්තු නිධානයන් ලබා ගැනීමකි....... මෙහිදී ඔබට පවසූ උපහරණය වැරදි ලෙස අවබෝධ නොකරගත්හොත් මැනවි. එම නිධාන ලබාගන්නා හොරුන්ට වැඩි කල් සැප විඳිය නොහැක. එනයින් මම එය, තම එක් අතක් කපා දී අනෙක් අතට ලබාගත් අසූචි ලෙස හැඳින්වුවෙමි.

අපි දැන් කතාව පටන් ගමු...
මේ කතාව මට මුහුණු පොතේ පණිවිඩයක් මගින් කෙනෙක් එවපු 1ක්. පසුව මම මෙම කරුනු සනාථ කර ගැනීම සඳහා මෙය ගැන විපරම් කර බලුවා . කතාව සත්‍යකි. රාවණ නරේන්ද්‍රයන්ගේ සිරුර හෙවත් මමිය (ඕගොල්ලන්ට පුරුදු වචනින්) තිබේ යැයි විස්වාස කරන තැනක් තමා රාවණා ඇල්ල පිහිටි ප්‍රදේශය... මහ කුඩු ගල ගිරි ශිඛරය මධ්‍යයේත් රාවණ රජතුමාගේ මමිය තිබෙන බව ඉපැරණි පුස්කොළපොත් වල ඇති බව ආචාර්ය මි‍රැන්ඩෝ ඔබේසේකර මහතා පෙන්වා දී ඇති අතර, රාවණා ඇල්ල ප්‍රදේශයේ රාවණ රජතුමාගේ සිරුර තිබේ යැයි මෙම ලිපියේ සඳහන් වීමෙන් ඔය කතන්දර දෙකෙන් එකක් බොරුවක් නොවන බව කිව යුතුය. බටහිරයින්ගේ තර්ක අප ගණන් නොගනිමු. රාවණ ඉතිහාසය ගැන දන්නා අය මෙවන් පරස්පරතා ණුවනින්විමසා™ ලිහන ආකාරය හොඳින් දනී.

මෙම ප්‍රදේශය ඈදෙන සේ නව ව්‍යාපෘතියක් අරඹා තියනවා ඉරාන රජයත් සමග එක් වී. ඒ තමා "උමා ඔය දස අවුරුදු සැලැස්ම". අපි මේ කියන සිද්දිය උන තැනට යන්න තියෙන්නේ මෙන්න මෙහෙමයි.

වැල්ලවාය නගරයේ සිට කිලෝමීටර 12 ක් යනකොට තියෙනවා හුනුකැටිය නමින් හන්දියක්. එතන තම උමා ඔය ව්‍යාපෘතිය තියෙන්නේ. ඒක දස අවුරුදු සංවර්ධන සැලැස්මක නමින් යන වංචනික වැඩක්. වැල්ලවායේ සිට වැලිමඩ ට හාරන කිලෝමීටර 24.8 ක් දිග උමගක් තියනවා එම උමග රාවණ ඇල්ල අභ්‍යන්තරයෙන් (යටින්) තමා කැනීම සිදු වෙන්නේ.

සැබවින්ම වැලිමඩ සිට වල්ලවායට ගෙන ඒමට තරම් ජල කන්දරාවක් වැලිමඩ නැහැ.(දන්නෝ දනිති).
මෙයට සම්බන්ධ ලාංකීය අවජාතක නරියන් ගේ සැලැස්ම වෙන්නේ මෙහි තිබේ යැයි විස්වාස කරන රාවණ රජු ගේ සිරුර තැන්පත් කර ඇති ස්වර්ණ බහාලනය නොහොත් පෙට්ටිය ලබාගනීමයි. රාවණ රජතුමාගේ මාලිගාවව හෝ ඊජිත්තුවේ පිරමීඩ හදපු රාවණාට තිබූ ඊටත් වඩා ලොකු පිරමීඩ තාම හොයාගන්න බැරි වුණාට උන්දැගේ පෙට්ටිය හොයාගන්න පුළුවන් දැයි සමහර අවජාතක පාහරයින් අසන අතර, උන්ගේ මෝඩ ප්‍රශ්න වලට පිළිතුරු දීම අප නොකරමු.

ඉරානයින්ට අවුරුදු පහක් යනකම් වතුර දෙන මෙම ව්‍යාපෘතිය ශ්‍රී ලංකා මිනිසුන්ගේ ධනය සූර කෑමකි.
මෙම ලිපිය මට ලබා දුන් පුද්ගලයා එම ස්ථානයේ වැඩ කරමින් සිටි කාලයේ සිතා ගැනීමටත් නොහැකි දේ එම ස්ථානයේ සිද්ධ වී ඇත. මෙහි කන්ද උඩට යන මාර්ගයේ විශාල කළු ගල් පර්වතයක් සහ පෞරාණික නුග ගසක් පිහිටා තිබී ඇත.නමුත් කන්ද මුදුනට යැමට පාර සකස් කර ගැනීමට අවශ්‍ය වූ ඉරානයන් මේවා කපා විනාස කර ඇත. එම පර්වතය සහ ගස කැපීමට ප්‍රථම ගම්වාසීන් විසින් එහි ආනුභාවයන් සහ එම දෑ විනාසය නිසා සිදුවීමට හැකි විනාශයන් ගැන පැහැදිලි කිරීමක් සිදු කර ඇත.

නමුදු කිසිදු අධ්‍යාත්මයක් විස්වාස නොකළ ඉරානයන් විසින් ඒවා කඩා විනාස කර දමුහ. නමුත් එදා ඉඳලා එතනට එන යන වාහන වැඩ බිමේ යන්ත්‍ර සූත්‍ර කුමක් හෝ යාන්ත්‍රීය දෝෂයක් උද්ගත වී අඩපන වී ඇත .සැහෙන මිනිසුන් ප්‍රමාණයක් අනතුරු වලට භාජනය වී ඇත.  යන්ත්‍ර අඩපන වීමට සහ මිනිසුන්ට අනතුරු වීමට, පර්වතයත් ගසත් විනාස කරන තෙක්ම සිටියේ අහවල් කාරණාවකදැයි අසමින් හෙළයට නින්දා කරන පාහරයින්ට හොඳක් නොවනු ඇත.

10 වීල් 1ක් කුඩු වී ඇත. එහි සේවය කල රියදුරු ගේ පාදය දරුණු ලෙස කැඩී ඇත. වාසනාවකට රියදුරු බේරී ඇත, පුදුමය නම් රියදුරු රෝහල් ගත කිරීමට පැමිණි 4 වීල් ජීප් රථය ද කඳු බැවුමේදී අකර්මන්‍ය වී ඇත. එතනම ගල් පටවපු එක්ස්කැවේටර් යන්තරය ද ගලක් විසිවීමෙන් අනතුරට ලක් වී ඇත.එම එක්ස්කැවේටර් යන්තරයට නිකන්ම ගලක් විසිවී එහි සේවකයාගේ කකුල් කැඩී ඇත. මේවයේ ෆොටෝ සහ වීඩියෝ අප ළඟ ඇත. එම ෆොටෝ සහ වීඩියෝ පළ නොකරන්නේ මොකදැයි අසන පාහරයින්ටත් ඔය දේවල්ම වෙනු ඇත.

එහි තිබූ බොහොමයක් වටිනා නිධානයන් දැනටමත් මංකොල්ල කා ඉවරයි කියා අපට දැනගැනීමට ලැබුනි. එතරම් බලගතු රාවණා හෙළ යකුන්ගේ හාස්කම් ඇති තැනකින් ඉරාන කාරයින් සහ ලාංකික පාහරයින් එක් වී නිධානයක් සොරකම් කළේ කෙසේදැයි අසන උදවියගේ මෝඩ කම ගැන අප කණගා‍ටු වෙමු.
 
කෙසේ වෙතත් ඔය ජර මර අස්සේ ඉන්දියන් සෙට් 1ක් ඔය පැත්තට ඇවිත් රාමා ගේ කතාව ඇත්තක් යැයි පෙන්වීමට උත්සාහයක නිරත වෙයි. මේ සියල්ලෙන්ම පෙනෙන්නේ එම ව්‍යාපෘතිය වහාම නවතා දැමිය යුතු බවය. ඔබත් හෙළ ජාතික ඉතිහාසයට ආදරේ නම්, ගෞරව කරන්නේනම් මෙම ලිපිය Share කරගනිමින්අන්තර්ජාලය පුරා ව්‍යාප්ත කරන මෙන් කාරුණිකව ඉල්ලා සිටිමි.

රාවණ අරක්කු භෝජනාගාරය (හෙළයින්ගේ රා පෙරීමේ තාක්ෂණය ඉදිරියටම)

ශ්‍රී රාවණ රජතුමාගේ නමින් පවත්වාගෙන යන අරක්කු තැබෑරුමක් ගැන ඔබ අසා තිබුණාද? නම හෙළි කිරීමට අකමැති අප වාර්තාකරුවෙක් දක්වන පරිදි එය පිහිටා ඇත්තේ ඇල්ල හන්දියේය. එහි නම RWANA LIQUOR RESTAURANT හෙවත් "රාවණ අරක්කු භෝජනාගාරය" නම් වෙයි.

වර්ගපූර්ණිකාව බ්ලොග් එක පරිශීලනය කරන රාවණගවේශකයින්ටත් මෙය ඉතාමත් වැදගත් තොරතුරක් බැවින්, අපගේ වාර්තාකරුවාගෙන් ලැබුණ තොරතුරු අනුව එම තැබෑරුමේ හිමිකරු වන පී.එම්.පී. මෛත්‍රීරත්න මහතාව දුරකථනයෙන් සම්බන්ධ කර ගැනීමට උත්සාහ දැරුවත් නොහැකි විය. එහෙයින් අප වාර්තාකරු ඉදිරිපත් කළ තොරතුරු එලෙසින්ම ඔබ වෙත ගෙන එන්නම්.

රාවන රජතුමාගේ නමට විවිධ අර්ථකතනයන් තිබේ. බොහෝ අය දන්නා අරුතනම් රා හෙවත් හිරුගෙන් එන නායකයා යන්නයි. ඒ අතර වර්ගපූර්ණිකාටුවා පුස්කොළපොතේ දැක්වෙන පද නිරුක්තිය අනුව,
රා=රා
ව=වක්කරන
න=නරේන්ද්‍රයා
අතීත හෙළයේ "රා" යනු අගනා ඖෂධයක් මෙන්ම ජාතික පානයද වූ අතර පර සුද්දන් විසින් අරක්කු ගෙන ඒමත් සමග රා වලට තිබූ තැන අහිමි විය. ලෝකයේ දක්ෂතම වෙදැදුරා වූ රාවණ රජතුමා රා වක්කර බෙහෙත් හැදූ නිසා එතුමාට "රා වක්කරන නරේන්ද්‍රයා" හෙවත් රාවන නම් විය. ඒ අනුව රාවණ=රාවන

රාවන රජතුමාගේ කාලයේදී හෙළයේ ජාතික පානය වී තිබුණේ "රා". පසුකාලයේදී වෑත්තෑවේ හිමියන් එම රාවන යුගයේ සිට පැවතෙන හෙළ සිරිත මෙලෙස තම ගුත්තිල කාව්‍යයේ භාෂා අලංකාරයටත් යොදා තිබුණි.

රැගත් සුරා පිරූ             විතින්
සුරත් තුඹුරු පෙතිසෙ නෙතින්
පුවත් නොදැන බමන    ගතින්
නටත් අයෙක් සුරා        මතින්

එහි "සුරා" ලෙස දැක්වෙන්නේ සු=සුමිහිරි, රා=රා යන්නයි. ගොඩක් රා බොන අයට "සුරා සොඬුන්" යැයිද පවසා තිබූ අතර පසුකාලයේදී ඉංග්‍රීසීන් විසින් විසින් සුරාව ගමක් ගමක් පාසා ව්‍යාප්ත කර ඇත. ඉංග්‍රීසීන් හෙළයෙන් ගියත් තාමත් බොහෝ හෙළයෝ සුරා පානය කරන්නේ හෙළ අසුරයින්ගෙන්ම පැවතෙන බව මනාව ඔප්පු කරමිනි.

"රාගම" යනු අතීත හෙළයින්ගේ රා පෙරීමේ තාක්ෂණය ගැන පුරාවිද්‍යාත්මක සාක්ෂි හමුවෙන ස්ථානයකි. රාගමින් හමුවූ සෙල් ලිපියක මෙලෙසින් තිබේ.
"මහ රව රජ මහ ර සක තබ".
එහි තේරුම නම්, "මහා රාවන රජතුමාගේ මහා රා ස්කාගාරය සහ තැබෑරුම". දැන් රාගම යන්නේ පද නිරුක්තිය බලන්න. වර්ගපූර්ණිකා‍ටුවාවට අනුව රාගම යනු,
රා=රාපෙරූ,
ගම=ගම.
ඉතා පැහැදිළියි, අතීත හෙළයේ ලොව ප්‍රමුඛතම රා පෙරීමේ ස්කාගාරය තිබී ඇත.

අයියනර්

අදටත් ඉන්දියාවේ උදවිය අයියනර් යනුවෙන් දෙවි කෙනෙක්ව අදහයි. ඒද ශ්‍රී රාවණ රජතුමගේ අවතාරයක් බව හිංදු ඉතිහාසයේ දැක්වේ. එනම්,
අයිය=අයියා
නර්=නරයා
නරයින්ට අයියා වන්නේ ශ්‍රී රාවණ රජතුමාමය. සූර් වූ හරකෙක් මත වැඩ සිටින අයියනර් දෙවියන්ට පඬුරු ලෙස දිය යුත්තේ අරක්කු ය. එවිට එම දේවෝත්තමයා, තමා ඉදිරියේ වැඳ වැටෙන බලුගැත්තාට තිබෙන සියලුම හිතේ කරදර වලින් නිදහස් කරනු ඇත. අදටත් අපගේ ගම් පළාත් වල සිටින රා/අරක්කු බී සූර් වූ උදවිය ඉහත අයියනර් දෙවියන් ගේ විලාශයෙන්ම මන්නයක් අතට අරගෙන තවත් කෙනෙකු පසුපස හඹා යමින් කරන්නේ අයියනර් සඳහා දේව පූජාවකි.

ඉතාමත්ම ශෝකජනක පුවත වන්නේ, වර්තමානයේදී අයියනර් දේවාලය "මලයාලි සක්කිලියන්" විසින් බලහත්කාරයෙන් අල්ලාගෙන සිටීමයි. බලන්න ඉහත පින්තූරයේ සිටින මලයාලි සක්කිලියන් හතර දෙනා අයියනර් දෙවියන්ට ලැබෙන අරක්කු හොරෙන් බී සූර් වී සිටින අන්දම? මෙවන් අපරාධ දැක දැක අප හෙළයින් නිහඬව සිටින්නේ ඇයි? වර්ගපූර්ණිකාව බ්ලොග් අඩවියට වටිනා කොමෙන්‍ටු එක් කරන අපගේ මිත්‍ර "ඇනෝනිමස් වන් ඔරිජි" තුමන්, මලයාලි සක්කිලියන්ට ලුණු ඇඹුල් ඇතිව බනිද්දී ඔහුට හිනා වූ අය ඉහත පින්තූරයේ සිටින මලයාලි සක්කිලියන්ගේ වැඩ කිඩ ගැන කුමක් කියනු ඇත්ද?

ඒ අතර "ඇල්ල" ප්‍රදේශයෙන් ලැබුණු ඉපැරණි හෙළ යක් භාෂාවෙන් ලියන ලද රන් සන්නසකට අනුව රාම කුමාරයා වඳුරන් සමග ලංකාපුරය ආක්‍රමණය කර තිබුණේ සීතාව සොයාගැනීම එකම අරමුන කරගෙන නොවේ. අප හෙළයින්ට තිබූ රා මැදීමේ තාක්ෂණය සොයාගැනීම ප්‍රමුඛතම අරමුණ විය. එකල ඉන්දියාවේ වඳුරන්ද රා බීමේ රුසියන් වූ අතර එම වඳුරන්ට රා මැද වක් කිරීමේ කාර්යය, කාලයක් වනයේ පි‍ටුවහල්ව සිටි රාම කුමාරයා විසින් කර ඇත. "රාම" යන්නේ පද නිරුක්තිය බලන්න.
රා=රා
ම=මදින්නා.
ඉතාමත් ප්‍රාථමික තාක්ෂණයක් තිබූ එම රාමදින්නාට (රාමට) ලංකාපුරයේ ශ්‍රී රාවණ රජතුමාගේ රා මැදීමේ දියුණු තාක්ෂණය අවශ්‍ය විය. අදටත් ඉන්දියාවේ ඇති සුවිශාල අරක්කු ස්කාගාරයන් වැඩ කරන්නේ එදා ශ්‍රී රාවණ රජතුමාට තිබූ රා මැදීමේ තාක්ෂණය යොදා ගනිමින් බව, ඉන්දියානු පුරාවිද්‍යාඥයින් පවා පිළිගන්නකි.

ඊළඟට එම තඹ සන්නස හමුවූ "ඇල්ල" නගරයේ පද නිරුක්තිය බලමු.
ඇල්=ඇල්වූ
ල=ලබුකැටය.
එම තඹ සන්නසේම සඳහන් වන්නේ ශ්‍රී රාවණ රජතුමා එකී, ප්‍රදේශයට එද්දී උණු කර රා පිරවූ ලබු කැටයක් අරගෙන ආවත් එහිදී සීතලටම එහි වතුර ඇල් වී ඇති බවයි. ඒ අනුව ඇල්වූ ලබුකැටයේ නමින් "ඇල්ල" කියා එය හඳුන්වා ඇත. පසුකාලයේදී එම ස්ථානයේ උණු කළ රා විකිණීමේ තැබෑරුමක් ඉදි කළ අතර, ඒ නටඹුන් අසළින්ම රාවණ රජතුමාට ගෞරවය පිණිස වර්තමාන "රාවන අරක්කු භෝජනාගාරය" ත් ඉදිකර ඇත. රා උණු කිරීමෙන් අරක්කු හදන බැවින් එය මනාව ගැලපෙයි. වර්තමානයේදීත් ඇල්ල ප්‍රදේශයේ ඇති එම තැබෑරුමේ අරක්කු විකිණීම, අතීත "උණු රා" විකුණූ හෙළ යකුන්ගේ පරපුරේම අය විසින් කරන්නකි.

එසේම ඉදිරියේදී රට පුරාම "රාවණ අරක්කු භෝජනාගාර" ඉදි කිරීමට මෛත්‍රීරත්න මහතා බලාපොරොත්තු වෙන බව දැනගන්නට ලැබුණි. පසුගිය කාලයේදී ශ්‍රී රාවණ නාමය නැවත මතු කළ සියලුම රාවණ ගවේශකයින්ට මෛත්‍රීරත්න මහතාගේ ස්තුතිය හිමි වේ.